সেই মৰ্মে দুৰ্গা কুটুমে যেতিয়াই বুঢ়াপাহাৰৰ পৰা হাতীজনী বোকাখাতৰ নিজ বাসগৃহলৈ আনি আছিল, ঠিক সেই সময়তে আদবাটতে "হাতী দৰ্বাৰ"ৰ মালিক আশ্ৰফ আলীয়ে সদলবলে আহি গুণ্ডাগিৰিৰে হাতীজনী বলপূৰ্বকভাৱে কাঢ়ি লৈ যায়।

এই সমগ্ৰ ঘটনা সন্দৰ্ভত ভুক্তভোগী দুৰ্গা কুটুমে ন্যায় বিচাৰি ইতিমধ্যে বোকাখাত আৰক্ষী থানাত এখন এজাহাৰ দাখিল কৰিছে। উল্লেখ্য যে, অভিযুক্ত আশ্ৰফ আলীৰ বিৰুদ্ধে উজনি অসমত থিতাপি লৈ অসমৰ ঘৰচীয়া হাতী অৰুণাচল প্ৰদেশৰ দুৰ্গম পথেৰে বহিঃৰাজ্যলৈ অবৈধভাৱে সৰবৰাহ কৰাৰ এক দীৰ্ঘদিনীয়া চক্ৰ চলাই থকাৰ গুৰুত্বৰ অভিযোগ আছে। এই আন্তঃৰাজ্যিক হাতী সৰবৰাহকাৰী চক্ৰটোৰ সন্দৰ্ভত পূৰ্বেও সংবাদ মাধ্যমত ব্যাপক বাতৰি প্ৰকাশ পাইছিল যদিও চৰকাৰ তথা প্ৰশাসনৰ ৰহস্যজনক নীৰৱতাৰ বাবেই এতিয়া এনেদৰে দিন-দুপৰতে ডকাইতি সদৃশ কাণ্ড সংঘটিত কৰিবলৈ সাহস পাইছে বুলি সৰ্বত্ৰে চৰ্চা হৈছে।

প্ৰণিধানযোগ্য যে, ইয়াৰ পূৰ্বেও উজনি অসমত চোৰাং সৰবৰাহকাৰীয়ে অসমৰ ঘৰচীয়া হাতীৰ জীৱন্তে দুটাকৈ দাঁত কাটি লৈ যোৱাৰ দৰে এক অতি ভয়ংকৰ তথা নিৰ্দয় ঘটনা সংঘটিত কৰিছিল। কিন্তু অতি পৰিতাপৰ বিষয় যে, আজি পৰ্যন্ত সেই বৰ্বৰ কাণ্ডৰ সৈতে জড়িত চোৰাং সৰবৰাহকাৰীক কৰায়ত্ত কৰিবলৈ সক্ষম নহ’ল বন বিভাগ বা আৰক্ষী।

আইনক বুঢ়া আঙুলি দেখুৱাই চলোৱা এই ডকাইতি কাণ্ডৰ পিছত এতিয়া বোকাখাত আৰক্ষীৰ পৰৱৰ্তী পদক্ষেপ সঁচাকৈয়ে লক্ষণীয় হ’ব। ভুক্তভোগী পৰিয়ালটোৰ লগতে স্থানীয় ৰাইজে দোষীক শীঘ্ৰে গ্ৰেপ্তাৰ কৰি হাতীজনী উদ্ধাৰ কৰাৰ দাবী জনাইছে।