ডিজিটেল ডেস্ক: ৰাজনীতিৰ মঞ্চত নিজৰ বক্তব্য, আত্মবিশ্বাস তথা ধাৰণাৰে আলোচনাৰ কেন্দ্ৰত থকা ৰাঘৱ চাড্ডাৰ এইবাৰ বলীউড যাত্ৰা। হয়, শেহতীয়াকৈ আপ এৰি বিজেপিৰ কৱচ পিন্ধা ৰাজনীতিৰ সমান্তৰালকৈ গ্লেমাৰ আৰু বলীউডৰ সৈতে তেওঁৰ সম্ভাৱ্য সংযোগক লৈও চৌদিশে এতিয়া কৌতূহলৰ সৃষ্টি হৈছে।

এই চৰ্চাৰ মাজতেই তেওঁৰ পত্নী তথা বলীউডৰ অভিনেত্ৰী পৰিণীতি চোপ্ৰাৰ এটা পুৰণি বক্তব্য পুনৰ আলোচনালৈ আহিছে, য'ত তেওঁ ৰাঘৱৰ সম্ভাৱ্য 'বলীউড ডেবিউ'ক লৈ স্পষ্ট অথচ মজাৰ সুৰত নিজৰ মত প্ৰকাশ কৰিছে।

ৰাজনীতিৰ পৰা বলীউডলৈ কৌতূহলৰ যাত্ৰা

ৰাঘৱ চাড্ডা নিজৰ স্পষ্ট তথা আত্মবিশ্বাসী মন্তব্যৰ বাবে জনপ্ৰিয়। যুৱ সমাজৰ মাজত তেওঁৰ এক বিশেষ অনুসৰণকাৰী গোট আছে।

সেই কাৰণেই বহুতে মজাৰ ছলেৰে কৈ থাকে—'ইমান হেণ্ডছাম আৰু স্মাৰ্ট নেতা ফিল্মত কিয় নাই ?' এই ধৰণৰ কথাবোৰেই সময় সময়ত তেওঁৰ সম্ভাৱ্য বলীউডত প্ৰৱেশক লৈ চৰ্চাৰ খোৰাক তোলে।

কি কয় পত্নী পৰিণীতিয়ে ?

এখন ছবিৰ স্ক্ৰীনিঙৰ সময়ত পৰিণীতিক যেতিয়া এই বিষয়ে সোধা হৈছিল, তেওঁ হাঁহিৰ মাজেৰে এক স্পষ্ট উত্তৰ দিছিল। তেওঁ কৈছিল যে মানুহে সদায় মজাৰ সুৰতে কয় ৰাঘৱক ফিল্মত দেখা উচিত। কিন্তু তেওঁ স্পষ্টকৈ কৈছিল—এই সকলোবোৰ কেৱল মজাৰ কথাহে।

তেওঁ লগতে উল্লেখ কৰিছিল যে ৰাঘৱৰ প্ৰকৃত পৰিচয় হৈছে ৰাজনীতিক, আৰু তেওঁ দেশসেৱাৰ কামতেই সম্পূৰ্ণ মনোযোগী। পৰিণীতিয়ে কয় যে দুয়োৰে কাম সম্পূৰ্ণ পৃথক—'তুমি তোমাৰ কাম কৰা, মই মোৰ কাম কৰো'—এই ভাবেই তেওঁলোক আগবাঢ়ি যায়।

ৰাঘৱ চাড্ডাৰ দৃষ্টিভংগী

ৰাঘৱ চাড্ডায়েও পূৰ্বতে এক সাক্ষাৎকাৰত ৰাজনীতি আৰু অভিনয়ৰ মাজৰ সাদৃশ্যৰ কথা উল্লেখ কৰিছিল। তেওঁ কৈছিল যে ৰাজনীতিতো বহু সময়ত 'নাটক' আৰু 'অভিনয়'ৰ প্ৰয়োজন হয়, কাৰণ ভোটাৰৰ মন জয় কৰাটোও এটা দক্ষতা। এই মন্তব্যই এটা কথা স্পষ্ট কৰে যে, তেওঁ ৰাজনীতিক এক জটিল কিন্তু জীৱন্ত ক্ষেত্ৰ হিচাপে বিবেচনা কৰে।

বলীউডৰ ছবিত অভিনয়—কেৱল কল্পনা নে বাস্তৱ ?

যদিও সামাজিক মাধ্যম আৰু অনুৰাগীৰ মাজত কেতিয়াবা এই ধৰণৰ কল্পনা উঠে, বাস্তৱত পৰিণীতিয়ে স্পষ্টকৈ কৈছে যে ৰাঘৱৰ বলীউড যাত্ৰা সম্ভৱ নহয়। তেওঁৰ প্ৰাথমিক লক্ষ্য সদায় ৰাজনীতি আৰু জনসেৱা।