Assembly-o Opposition dolrangnade nanganirangko chanchirimna chu·onga gita somoiko on·rongjani gimin ramarangona re·ange jingjengatanirangko dakna nangaia ine Voice of the People's Party (VPP)-ni matnange agangipani bidingo janapatengon, ian gital katta ong·ja aro iani bidingo changni chang Assembly-oba aganaha ine Sangma parakataha.
Assembly-o seoka man·gipa dilgiparangna chu·onga gita somoiko on·china dabianiara, sorkarini kamrangko nipiltaina cholko on·anisa ong·a ine Sangma aganaha.
Sangma-ni parakatani gitade, Assembly session-rangko bang·gija salrangnasan ong·atrongani gimin adita salrangna skang, Business Advisory Committee (BAC)-ni tom·anioba opposition member-rang sing·doangaha.
Meghalaya a·doko chadamberangni dilgipana seoka man·anio tang·dobaroroengako nikna man·engani gimin a·dok sorkari, Assembly session-rangko ru·utkale ong·atna nangchongmotenga ine janapatengon, seokako man·gipa pilak dilgiparangan, jera ra·grikanirango bak ra·pana aro daitotangtangko nambate chu·sokatna man·na gita sorkari, pilak member-rangnan chu·onga gita somoiko on·na nanga ine Opposition dolni dilgipa aganaha.
1993 bilsionin an·tangni Assembly-o member ong·baengako gisik ra·atpilengon, batanggimin changrangode, mongsongbate Budget session aro dabianirang donggenchimode session-rangko ru·utkale ong·atrongchim ine Sangma aganaha.
Sorkarini program mingantikon nambate chu·sokatna aro manderangni tangka paisarangko name jakkalna gita sorkarini kamrangko name nipiltaina nangchongmota ineba ua aganaha.
Assembly session-rangko ong·atanio member-rangna chu·onga gita somoirangko on·jagenchimode, sorkarini kamrangko chu·sokatanio olgrokanirangko nikna man·aigen ineba Opposition dolni dilgipa aganaha.
Sangma-ni aganani gitade, Question Hour-ni ja·man session-ni somoiko baditaba kontarangna ra·dodapaianikode, chu·onga gita somoiko ra·dapa ine aganna man·jawa.
Re·baenggipa August 24 tarikoni ong·atenggipa Autumn Session-koba sorkari salbongamangmangsan ong·atna tik ka·aiahachim.