SHILLONG: 2027 bilsini Census-ko ka·na gita da·o kamrangko a·bachengengahaon, census-ko ka·anio skigiparangni jak on·paaniko sorkari nangchongmota ine Sonibar salo, a·dokni GAD Minister Sosthenes Sohtun parakatenba, skigiparang dingtang dingtang kamrangko ka·na nange neng·nikanirangko chagrongna nanga ine sorkari ma·sichakengani gimin daitorangko simsakesa on·skaronga ine talataniko on·angaha.

Iani bidingo talataniko on·angengon, bi·sarangko mande ong·atanio skigiparangan mongsonggipa kamrangko ka·giparang ong·a aro skigiparangni neng·nikanirangko sorkari ma·sichaka ine Sohtun aganaha.
Census-ni gamchataniko talate on·angskaengon, nokdangrang sorkarini on·enggipa dingtang dingtang scheme-rang, jekai Mahamta Gandhi National Rural Employment Guarantee Act (MGNREGA), ration, sanna banani cholrang aro uandakgipa dingtang dingtang namgnirangko man·ama man·ja, ia pilakkon census ka·anichisa on·na man·a aro ian a·dokni manderangna namen nangchongmotgipa ong·a ine GAD Minister parakataha.
A·doko songdongenggipa manderangko aro nokdangrangko name segatanichisa, sorkarini on·enggipa dakchakani aro namgnirangko on·na man·a ineba Sohtun talataniko on·angaha.
Skigiparang dingtang dingtang daitorang dongani giminan skulrango skie on·anio maming nangchakeanirangko man·jana gita census-ko ka·anio skigiparangna kamrangko nangana bate on·rongja ineba Minister talataniko on·angaha.
Skigiparangara, a·gilsakni seng·aniko ba bida budiko on·giparangsan ong·ja indiba census-ko ka·anio dakchakaniko on·anichi, a·doko songdongenggipa nokdang ge·antinan, uamangni man·gnirangko on·anio dakchakgiparangba ong·a ine GAD Minister parakataha.