Momin-ni parakatani gitade, Garo Hills-o songdongenggipa Hajong, Koch, Rabha, Boro-Kachari aro Maan jatrangko Scheduled Tribe-rang ine chanaiani giminde dingtang regional council-ko man·gen ine ma·sisretna nangani ong·ja.
Sixth Schedule-ni Paragraph 1(2)-ni bidingo janapatengon, ia niamni ning·o, dingtang dingtang ST-rangni songdonggipa biaprangko a·dokni Governor, dingtang dingtang autonomous region dake bak ka·na bilko man·genchimoba, ian dingtang Regional Council-ko on·telna nanggen ine janapani dongja indiba 'man·a' ingipakosa janapaia ine Momin parakataha.
ST ine chanako man·ani, minority ba 'unrepresented tribe' status, autonomous regions aro Regional Councils-ni gisepo niam bidikni gita namen dingtangani donga ine janapatengon, chonchongipa tribal jatrangoni under-representation-nade territorial autonomy-na dabijolna man·ja ine Momin parakataha.
Garo Hills Autonomous District Council (GHADC)-ni ning·o donggipa a·arango dingtangatanirangko ra·bana nanggenchimode, ian A·chikrangni a·ani nokgipa ong·anio, mongsongbate A·kingrango aro Nokmarangna on·gimin bilrango nangchakeaniko ra·bagen ine Momin parakataha.
Chonchongipa ST jatrangni dingtang Regional Council-na dabienggipani bidingo janapatengon, ianade skanggipa A·kingni a·arangko name nichengna nanggen, badia biaprangko sima dake ra·na miksongenga, badia songrangko man·chapna miksongenga, council-na miksongenggipa bilrangko aro GHADC baksa mai nangrimani dongna miksongenga, iarang gimikkon talatchengna nanggen ine Momin parakataha.
Iani bidingo maming ja·kurangko de·na skangba Regional Council Demand Committee (RCDC)-ni miksongenggipa simarang, mandeni jelbra jelsuani, bimang, bil, tangka paisa nangani, a·a aro uandakgipa pilak nanganirangko ra·chengchina gita Momin, Meghalaya sorkari aro GHADC-ko didiangaha.
Ian Hajong, Koch, Rabha, Boro-Kachari ba Mann jatrangni baksa A·chikrangni meligrikgijanikode mesokenga ong·ja ine talataniko on·angengon, ian niam bidikni kosako re·aniko mesokani gitasa ong·enga ine Momin parakataha.