WILLIAMNAGAR: East Garo Hills a·jani Dawa Gittinggre songo, Village Employment Council (VEC)-ni president aro secretary, songo ka·enggipa project-rangni gimin talate on·jaenga aro work order-rangkoba mesokjaenga ine songni manderang, Samanda C&RD Block-ni Block Development Officer (BDO)-na badi ka·doatenba, ia project-rangni bidingo inquiry-ko dakchina didiataha.
Jolo songdongenggipa manderangni Samanda BDO-na sedoatgipa chittio parakatani gitade, VEC-ni president aro secretary, songo ka·enggipa project-rangni bidingo talate on·jaengani gimin aro work order-rangkoba mesokjani gimin kamko ka·enggipa songni manderang, badia kamni tangkarangko man·enga aro badia kamni tangkarangko man·kujaenga, mamingkon tale ma·sitokjaenga.
"Job card-ni president aro secretary, songni gita mamingkoba talate on·ani dongja aro kamni work order-koba mesokja. Iani a·selan songni manderang, mai project-ni tangkako man·enga aro mai project-ni tangkako man·kuja ma·sinan man·jaengaha. Uni gimin chingni president aro secretary-ko okamate sing·sandianiko dakchina chinga nang·ko mol·molenga," ine Dawa Gittinggre songni manderang, Samanda BDO-na sedoatgipa chittio parakataha.
2023 bilsioni 2025 bilsiona matchotgijagipa project-rangni gimin janapatengon, 2023-2024 bilsio sanction ka·gipa water tank ge 7-oni ge 2-kosan ka·kuenga ine Dawa Gittinggre songni manderang parakatenba, ia bangki project-rangko basako matchote ka·na am·enga ine sing·doataha.
Project ge·antion sign board-rang dongja ineba songni manderang matnangataha.
Iana agreba, 2025-26 bilsio sanction ka·gipa CC Footpath, Soil department-ni Irrigation Dam, 2025-26 bilsini AWC building repairing aro uandakgipa kamrangni giminba Dawa Gittinggre songni manderang, Samanda BDO-na badi ka·e sedoataha.