Rule No 128-129 Amendment Bill-ko election-na skang pass ka·gen: CEM
TURA: Garo Hills Autonomous District Council (GHADC)-o Mongolbar sal dipet Special Budget Session-ko ong·atengon, ia session-ni gittamgipa sal, chong·motan Bristibar salo, dingtangmancha Garo Hills-o songdongenggipa manderang aro dingtang dingtang dolrangni ru·uta bilsirangoni dabibaenggipa Separate Electoral Roll (SER)-ni bidingo GHADC-ni membor-rang chanchirimangaha.
SER-ko tarina gita songe on·gipa committee, dingtangmancha report-ko GHADC-ni Executive Committee-na pakwate on·angani ja·man da·o ia Bill-ko GHADC-ni Session-o pass ka·na gita membor-rang, apsan chanchirimangaha.
Unbaksana 2027 bilsini March 31 tarikona tarigipa General Budget Estimate-ni giminba ia salni bako GHADC-ni membor-rang, ku·cholsan chanchirimangaha.
SER-ko tariani bidingo committee-ni on·gipa report-ni gimin chanchirimangengon, ia report-ko Council-ona ra·baahani gimin pilak membor-rangan mittelpilangtokaha aro ia Bill-o on·dapna nanganirangko on·dape, galna nanganirangko galchina ku·pattianiko on·angtokaha. GHADC-na dingtang electoral roll-ko tarianio Rule No. 128-129-ko taridapna nangengani gimin ia Bill-ko election-na skangan pass ka·gen ine GHADC-ni Chief Executive Membor (CEM) Dhormonath Ch Sangma ku·rachakaniko on·angaha.
Indake ong·genchimoba, SER-ko tarianio mikkangchi maming neng·nikanirang dongjana gita ia report-ko name dake nipiltaie chanchipiltaina ine Bristibar salni bako SER Bill-ko pass ka·gija, Session-ni bangki salrango chanchirimangkuna ine tik ka·e donangaha.
Session-ni Question Hour-o dingtang dingtang kamrang, jekai SER, GST, Printing Press, Village Court aro uandakgipa kamrangni giminba dingtang dingtang membor-rang sing·doangtokaha aro badiaba badiaba kamrangode opposition aro ruling membor-rangni gisepo bilakbee jera ra·grikanirangkoba nikangna man·aha.