TURA: Da·ororo chatro chatrirang aro chadamberang nangana bate Mobile Phone-rangko jakalanichi gisik gita neng·nikanirangko man·engani gimin aro pekgipa ringa cha·ani ba Drugs-ni namgijani ong·aniko mikrakataniko on·a Nasha Mukt Bharat Abhyaan-ni ning·o Garo Hills, Gorkha Welfare Society unbaksa District Administration aro District Social Welfare nangrime mijal Sonibal salo Nukkad Natak (Steet Skit)-ko ong·atangaha.
Ia Nukkad Natak ba Street Skit-ko Tura-ni damgittam biaprango jedake Tura Chandmary, Tura Bajar aro Dakopgre, PA Sangma biaprango ong·atangaha.
Iani bidingo Gorkha Welfare Society, Garo Hills-ni ku·wattimgipa Tengchi D Arengh-ni aganangani gitade, da·alo dal·drobaenggipa chadamberang chatro chatrirang jemangan mikangchi janggi tangani bakrokuengachim, jenan da·roro an·ching songsaro pekgipa ringa cha·ani mongsongbate Drugs jakalanirang batroroenganiko nikna man·enga. Unigisepon bilsi 12-oni 18 ong·gipa chadamberangko Drugs jakalaniona salangna altue man·a. Unigimin dal·drobaenggipa chadamberangko Drugs-chi sason ka·aoniko chel·atna miksonganio dingtang drugs-ni namgijaniko dakmesoke chadamberangna mikrakataniko on·a iandagipa program-ko chinga ong·atenga ine aganaha.
Iana agreba ia apsan dakgipa drugs-ni gimin program-ko chinga re·baenggipa October jani 2 tariko ong·atna sienga jeonan Social Welfare Department, Police Department aro dingtang dingtang skigiparangko Resource Person-na okamenga jedakode uamangna chadamberangna chatro chatrirangna drugs-ni namgijaniko nambate talatna aro agan-skie on·a man·gen ineba Tengchi D Arengh aganangaha.