Garo Hills-o anarosko mitam biaprangosan, mongsongbate West Garo Hills-ni Chibinang aro Bikonggre aro North Garo Hills a·jani Bangsi A·pal songosa ge·bata indiba ia biaprangoni Bangsi A·pal songan, anarosko bang·bate man·gipa biap ong·a ine kobor on·timgiparang parakataha.
Ia bilsio, North Garo Hills a·jao anarosko bang·bate man·engoba, anaros bagan dake cha·enggipa manderang, sorkari ba Agriculture department-niko dakchakanirangko man·jaenga ine nanga gita dakchakanirangko on·china didiatskaaha. Tangka paisani gita dakchakanirangko on·genchimode aro komia damo loan-rangko on·an baksana gama ge·anio gital kolrangko dakchake on·genchimode, uamangni gama ge·aniko bariate, man·gnirangkoba bariatna man·gen ine North Garo Hills a·jao anaros bagan dake cha·enggipa manderang aganaha.
Bangsi A·palo man·gipa anarosrang namen bitchi dakani gimin aro namen cha·tobeani gimin pilakan namniktokbeaha. Jolo songdongenggipa manderang aro gipin biaprangoni bading chiwale cha·enggipa manderangni aganani gitade, ia anarosrangko India a·songni dingtang dingtang biaprangona aro gipin a·songrangonaba watatenga.
North Garo Hills a·jao anaros bagan dake cha·enggipa manderang sorkarini chu·onga gita dakchakanirangko man·jaenga ine janapatengon, ia jolrango bang·bate anarosrangko ge·na man·na gita aro an·tangtangna janggi tangani cholrangko dake ra·na man·na gita pilak nanga dakchakanirangko on·china anaros bagan dake cha·enggiparang, a·dok sorkariko didiataha.