SHILLONG: Re·anggipa Sonibar salo, a·dokni Anti-Narcotics Task Force (ANTF), West Jaintia Hills Police baksa nangrime, National Highway (NH-06) ramao, nirok sandianirangko dakenba, mande sakgnioniko gong laksnimang ong·gipa heroin samrangko man·aha.
Sam badinggipa manderang, Silchar-oni Shillong-chipakna songreangenga ine koborko man·soani ja·man ANTF aro Police official-rang, Phramer jolo donggipa NH-06 ramao, re·ruraenggipa gari gorarangko nirokna a·bachengaha aro Sonibar pringni 8:00 bajimango, ML-05T 8381 bus gariko neng·takate saandirokon, ia garioni mande sakgnioniko gram 48.78 ong·gipa heroin samrangko man·aha.
Rim·a man·gipa mande sakgniara, Shillong songjinmani Umkdait, Nongmynsong-oni bilsi 33 ong·gipa Robert Nongrum aro Umkdait-III-oni bilsi 32 ong·gipa Batskhemlang Jarain ong·a ineba police ma·sina man·aha.
Ia manderangni ra·bitgipa baksooniko am·sandion ANTF-ni official-rang, jacket kingsao plastic-ni sabon bakso ge·gnio chipe ra·baenggipa heroin samrangko man·aha.
Ia mande sakgnikon police rim·aha aro da·o iani bidingo talbate sandirokanirangko dakengkua ine police official-rang u·iataha.
Meghalaya a·dokko pekatgipa samrangoni jakgitel ong·atna gita iandake sam badinggipa ba sam jakkalgipa manderangni bidingo koborko man·genchimode ta·raken ANTF-na ba sepangbatgipa police station-rangna u·iatchina gitaba official-rang, a·doko songdongenggipa manderangko didiataha.