SHILLONG: United Democratic Party (UDP)-ni adita sak MLA-rang, party-tangko wate gipin party-rango napskana siengahani gimin UDP bon·ani cholrang dongaiaha ine agananiko Meghalaya Trinamool Congress (TMC)-ni president Charles Pyngrope jegalatenba, MLA-rang wate kataiani giminde party bon·aignok, ia katta ong·ja ine parakataha.
UDP-ni MLA sakchet, Bharatiya Janata Party (BJP)-o napangna tariengahani gimin party-o member-rang dongjawaha ine chanchichipanirang ong·katengani gimin TMC-ni state president, ia kattarangko aganaha.
UDP MLA-rangni dabianirangko BJP knachaka ong·ode, uamang BJP-o napangani cholrang dongaia ine MLA-rangoni saksa parakani ja·man chanchichipanirang bilakbatahachim.
Indake ong·genchimoba, UDP-ni adita sak MLA-rang, BJP-o napangna miksongenga ine kobor on·aniko UDP-ni dilgiparangde jegalatskaenba, da·o dipet party-ni MLA-rang pilakan ku·cholsan ong·enga ine parakatskaahachim.
Ia MLA-rangni wate katna miksonganiara, Meghalaya a·doko regional party-rangni bon·na siengako mesokani ong·engama ine sing·anina aganchakaniko on·angskaengon, MLA-rangsa bon·ainaba gnang indiba regional party-rangde bon·kujawa ine Pyngrope aganaha.
MLA-rangni wate katanichi, badiaba partyp-rango MLA-rangsan komibataigen indiba party-de maming dakeba bon·jawa ine TMC president a·kangaha.
"Angni miksonganide, Assembly-o member-rangsa komibatgnok indiba UDP-de party ong·e dongangkuaigen," ine ua aganaha.
Badiaba regional party-ni MLA-rang, wate katgenchimoba uamangni biapo sakgipin member-rang dongrikskaaigen ine ua aganaha.
UDP-ni MLA sakchet, BJP-o napna siengahani gimin UDP bon·aignok ine agananiko jegalatengon, "UDP-ni member sakchet ba sakskude a·dok gimik ba UDP-ni member chu·gimikko mesoka ong·ja. Uamango hajalni hajal, lakni lak member-rang donga aro unoni da·o sakchet saksku ong·katanganichi maikai party-ko bon·atna man·gen?" ine Pyngrope sing·doataha.