RESUBELPARA: North Garo Hills a·jao adhoc aro deficit skulrango skigiparang, jagnini dormahako man·kujae neng·nikanirangko chagrongna nangtokenga ine badi ka·doangani ja·man da·al Budbar salni gisepon skigiparangna dormaharangko on·na North Garo Hills a·jani District School Education Office (DSEO)-oni ku·rachakaniko on·ataha.

Koborko man·soani gitade, SSA-ni ning·o adhoc aro deficit skulrango skigiparang, sorkarini dormaha on·ani bewalko dingtangataonin jagnini dormaharangko man·tokkujaengachim. Skigiparangni dormahako bariatani ja·man Garo Hills-ni gipin a·jarangode adhoc aro deficit skulrango skigiparang, batanggimin jagnini dormahakoba man·tokaha indiba North Garo Hills a·jaosa jagnini dormahako man·tokkujaenga ine kobor on·timgiparang parakataha.
"Chinga an·tangtangni dormaharangko jagnina kingking man·tokkujaengani gimin batanggimin antirango baditaba chang North Garo Hills-ni education office-ona re·ange sing·sandieaha aro uamang chingna bakan dormahako on·gnok ine ku·rachakatahaoba da·alonan dormahako man·chipkujaenga. Garo Hills-ni gipin a·jarangode skigiparang somoi gitan dormahako man·tokengon maini a·sel North Garo Hills a·jaode adhoc aro deficit skulrango skigiparang somoi gita dormahako man·skajaenga," ine a·jani deficit skulo skigipa saksa sing·doataha.
Skigiparangni dormahako bariata intalan North Garo Hills a·jao adhoc aro deficit skigiparang dormahako man·tokkujaenga ine janapatengon, kamrangko ka·anio maiba neng·nikanirang donggenchimode, skigiparangna dormahako somoi gita on·na a·bachengonin name tarisamsona nangachim ine sakgipin skigipa aganskaaha.
"Ia gital system-ko ka·anio neng·nikanirangko man·na nangenga ine pa·sikanikode chinga ra·chakna man·jawa maina jagnini dormahako man·jaengani a·sel chinga bang·en neng·nikanirangko chagrongna nangengaha," ine skigiparang aganaha.
Iani bidingo North Garo Hills a·jani DSEO-o sing·sandiaton, skigiparangna gital dormahako on·anio sorkari, gital system-ko ra·gataha aro iako da·o office-o kam ka·giparang tarina nangkuengani a·sel somoi nangenga ine parakataha.
Ia gital system-o digital-chi soi ka·aniko nanga aro iako re·anggipa Sukrobar salo treasury-ona ra·angon iako treasury-oni jechakaha ineba DSEO parakataha.
Indake ong·genchimoba, North Garo Hills a·jani skigiparangna Budbar salni gisepon jagnini dormaharangko on·na man·gnok ine DSEO ku·rachakaniko on·ataha.