RESUBELPARA: A·jatango ge·e game man·gipa rokomanti biterangko mesokna aro bite gnanggipa pangrangko ge·a gamaniko ra·dona miksongao mijal Bristibal salo District Horticulture Department unbaksa District Tourism & Promotion Society, Department of Tourism nangrime North Garo Hills, Resubelpara Indoor Stadium sepango Fruitopia Festival-ko ong·atanga.
Ia Festival-ona Tourism and Agriculture Minister Timothy D Shira mongsonggipa ong·baaha aro Festival-ko a·bachengate on·angaha. Iandakgipa festival-rangko ong·atanina Shira an·tangni kusi ong·aniko aganangaha aro festival-o dingtang dingtang adita mesokanggipa biterangko cha·tote niangaha.
Uandake ia Festival-ona North Garo Hills a·jani dingtang dingtang bakrangoni re·bae bak ra·angaha. Unbaksa dingtang dingtang school aro college-ni chatro chatrirangba re·bae bak ra·angtokaha.