RESUBELPARA: Niam gri koela bikotaniko am·sandina gita songako man·gipa High Court-ni gitcham Justice BP Katakey, Budbar salo, Garo Hills-ona re·baenba, niam gri koela bikotaniko champengani bidingo chanchirimna, North, East aro South Garo Hills a·jani District Administration-rang baksa Resubelpara-o tom·aniko ong·atangaha.
Ia tom·anio, a·ja damgittamni Deputy Commissioner (DC) aro Superintendent of Police (SP)-rang, Meghalaya sorkarini technical advisor Naba Bhattacharjee aro Mining department-ni director MB Tomper-ba dongpae bak ra·angaha.
Tom·a matchotani ja·man kobor ra·timgipa manderang baksa agangrikengon, Meghalaya a·doko, mongsongbate Garo Hills-o niam gri koela bikotaniko champengna gita action plan-ko tarina ua Garo Hills-ni official-rang tom·aniko ong·atangaha ine Justice Katakey parakataha.
"Meghalaya a·dokoba da·oba niam gri koelarangko bikotengkua aro iako darangba jegalna man·jawa. Iani a·selan adita salrangna skang, sak 18 manderang janggirangko gimaatna nangaha," ine ua aganaha.
Koelarangko salruraenggipani bidingo janapatskaengon, ia sal somoirango, niam gri bikotgipa, sandie man·gipa, niam gita bikotgipa aro sorkarini rim·gimin koelarangko salenga ine Katakey aganaha.
"East Jaintia Hills a·jao koela a·dam goprete a·sel ong·ani ja·man, Mining & Geology Department-ni ge·etanio pangchake district administration-rang, action plan-rangko tariaha aro ia gital action plan-ko ra·gatani ja·man niam gri koela bikotanirangko aditade komiatna man·aha indiba am·sandie man·giparangoni aditako nambate nipiltaina aro namatna nangkuenga," ine ua aganaha.
Niam gri koela bikotanina dingtang dingtang police station-rango badi ka·ani gimin janapatskaengon, "A·a nokgiparangni ia kamo jak donganikode sandiroka dongkujaengani gimin a·a nokgiparangni kamrangkoba sandirokna nanga maina a·a nokgiparangni ra·chakani gride, walsano ua biaponiko koela bikote salna man·jawachim. Uamangni a·arango mai ong·enga uko uamang ma·sija ine uamang aganna man·jawa," ine Justice Katakey aganaha.
South Garo Hills a·jaona agrede North aro East Garo Hills a·jaode da·o niam gri koela bikotenggipa a·damrang dongjaha ineba Katakey parakataha.
North Garo Hills a·jaona re·bana skang ua, Assam-ni Athiabari sambao donggipa Hahim songonaba re·ange, niam gri donenggipa koela a·damrangko nieaha.
Athiabari sambao Smart Gate, Dainadubi transport gate-oni metre 100-ni ning·o police picket aro Mendipathar Railway Station-o temporary check gate-ko kulina gita ua bakan Meghalaya High Court-na sedoatgen ineba Justice Katakey parakataha.