BAHGMARA: South Garo Hills a·jani, Rongara Sub-Division-ni ningo ong·gipa Moheskola bajar-o Sukrobar salo health camp-ko ong·atanga. Ia ongatanggipa program-ko Wildlife Trust of India (WTI)-ni Dr. Reddy's Laboratories, Garo Hills Autonomous Council aro sak 45 medical professional-rang baksana South Garo Hills-ni DMHO-rangn baksa nangrime ong·atangaha.
Iano State Forest Department aro Moheskola Police Outpost-ba dakchakpaaniko on·angaha.
Ia ong·atanggipa health camp-o sak 230 songni manderangan health check-up rangko ka·angaha aro porikka ra·e niani aro sana bananirangkoba dakangaha. Una agreba, be·en bimangko simsake rakkiani, rongtal an·talani, okko donggipa ma·gipa aro bi·sarangna nirok simsakani aro sabisirangko champengani bidingo program-o bakko ra·anggipa 120 chatro chatrirang aro sak 100 jolni manderangna mikrakataniko on·angaha.
Uni gisepon, Moheskola-ni Nokma Gilnesh Ch. Marak aro saksa skulo skigipa Midnightson Ch. Marak ia program-ko ong·atanggiparangko mittelpilangengon, ia program-ko ong·atanganichi ning·tubegipa songadam nokadamo donge lekka pora bidako ra·enggipa chadamberang skanggipa changna, rongtal an·talani aro me·chikrangni an·seng baljokani gimin u·ie ma·sie ra·angna cholko man·paaha ine aganaha.
Wildlife Trust of India (WTI)-ni Chief of Conservation Dr. Sandeep Kr. Tiwari jinma aganangenba, ia ong·atanggipa camp WTI-ni 'One Health' katta bichongo pangchake songadam nokadamrango an·seng baljokaniko aro samtangtangni ong·telaigparangko ripenge rakkina re·mikkangani ong·a jean GHADC aro Meghalaya Forest Department baksa nangrime battanggimin bilsi 20 rangonin dam 41 songrangni gisepo 'Garo Green' corridor-ni ning·o hectares 7, 500 Reserve Forest-rangko ripinge rakkina kamrangko ka·enga ine WTI-ni Chief aganaha.