SHILLONG: Shillong-ni Lok Sabha MP Dr Ricky AJ Syngkon-ni tanggitik siangani ja·man da·o ong·atpilna nangenggipa Shillong Lok Sabha by-election-na Bharatiya Janata Party (BJP), kamrangko ka·na a·bachengengaha indiba candidate-kode da·o dipet party seokkujaenga.

BJP-ni state general secretary Wankitbok Pohshna-ni u·iatani gitade, Shillong Lok Sabha by-election-o susana gita kamrangko ka·samsochina ma·mongni party dilgiparang, a·dokni dilgiparangna ge·etaniko on·atmanaha indiba by-election-o susana gita candidate-kode, election-ni bidingo parakatani ja·mansa Central Parliamentary Board, seokanggen.
Shillong parliamentary by-election-o BJP-ni tikitchi susana gita da·o dipet saksni manderangni dorgastorangko man·soaha ine u·iatengon, mikkangchi gipinrangba party tikitna dorgastoko galangkunaba gnang aro da·o dipet candidate-rangko bakkandikatkujaenga ine Pohshna aganaha.
2024 bilsini Parliamentary election-ode BJP susagija, NPP-ni candidate-na chakpaaniko on·skaahachim ine nikna man·a.
Indake ong·genchimoba 2024 bilsio, Shillong Lok Sabha seat-ko Voice of the People's Party (VPP) aro Tura seat-ko Congress cheskaahachim.
Koborko on·ani gitade, Shillong Parliamentary by-election-o BJP-ni tikitchi susana gita BJP-ni state spokesperson Mariahom Kharkrang, gitcham state president Ernest Mawrie aro Jaintia Hills-ni adita sak dilgiparangkoba mingsoani dongachim.