Ia gital skigiparangko, a·dokni dingtang dingtang sorkari college-rango donatgnok aro ia skigiparangna, Bristibar salo, a·dokni Chief Minister Conrad K Sangma, appointment letter-rangko sualataha.
Ia gital assistant professor-rang aro lecturer-rangna an·tangni namgipa skaniko on·angengon, ian sorkari college-rango kamko ka·na seokako man·asan ong·ja indiba ian chadamberangko mikkangchi mande ong·atna cholko man·anisa ong·enga ine Chief Minister aganaha.
Mandeni dal·roroanio lekka poranian mongsonggipa bak ong·a ine janapatengon, a·doko pass ka·ani percentage-ko namdapatna man·ahaoba aro poraianiko dontonggipa chadamberangko komiatna man·ahaoba, dingtangatani kamrang matchotkuja ine Sangma aganaha.
College-rango syllabus-mangmangkosan skie on·aigija ba an·tangtangni daitoko matchotnamangmangsan kamko ka·aigija, chatro chatri sakprakprakkon mande ong·atna aro dal·bate jumangrangko rikna an·tangtangko on·kange kam ka·china gitaba Chief Minister, gital skigiparangko ku·pattiangaha.