AM4thTA-ni general secretary Frederick Lyngdoh Tongkhar-ni parakatani gitade, SPF-ni ning·o apsan kamna apsan dormahako man·chape, 4th Teacher-rangni namgnina Education officer Mantri-ba mongsonggipa kamrangko ka·aha.
"Education department-ni Commissioner & Secretary Vijay Kumar Mantri-ko ra·galchina badiaba badiaba dolrangni dabianirangko chinga songbadrangoniko niksoaha indiba ia dabianiko chinga raken jegalaha maina ia official-sa, chinga 4th Teacher-rangni namgnina SPF-ko man·e on·aha," ine Tongkhar parakataha.
Tongkhar-ni parakatani gitade, maming ja·kurangko de·na skangba ia official, dingtang dingtang dolrang baksa chanchirimchengronga aro skigiparangni namgninasa ia kamrangko ka·aha.
SPF-ko ra·gate on·anichi, skigiparangni gisepo dormaha dingtanggrikaniko namatna man·aha ineba AM4thTA-ni general secretary parakataha.
"Batanggimin somoirangode dingtang dingtang gadangni skulrango dormaharang namen dingtanggrikachim indiba da·ode SPF-ko ra·gatanichi, apsan poraiani gadangrang donggipa skigiparang pilakan apsan kamna apsan dormahako man·paengaha," ine Tongkhar parakataha.
SPF-ko namdapatna gita Education officer Mantri-ko kam ka·angkuna chol on·na nanga ineba ua dabiangaha.
Sorkari skulrango, sanction ka·gimin post-rangna gital rakkigipa skigiparang pilakkon, Structured Pay Framework (SPF)-ni ning·o ra·na gita re·anggipa August-ni 19 tariko Education Department-ni u·iataniko on·ahani gimin dingtang dingtang skigiparangni dolrang, sorkariko jegalatenba, iani bidingo Education department-ni Commissioner & Secretary Vijay Kumar Mantri-ko ra·galchina dabiangtokahachim.
Sorkari skulrango sanction ka·gimin kamrangna gital rakkia man·gipa skigiparang pilakkon SPF-ni ning·o ra·gopna u·iataniko jegalatengon, ia SPF-koa sorkari, SSA, RMSA, Adhoc, 4th Teacher, Science Grant, Hindi Grant aro Pre-Primary gita fixed pay man·gipa skigiparangnasa a·bachengatahachim aro sorkari skulrangna sanction ka·gimin post-rango rakkigipa skigiparangnade miksongani dongjachim ine dingtang dingtang dolrang parakataha.