AMPATI: South West Garo Hills a·jani Purakhasia Multi Facility Centre (MFC)-o dingtangmancha program-ko ong·atangenba, Purakhasia aro Zikzak C&RD Block-ni nambatgipa Self Help Group (SHG)-rangna mini incubator machine aro Adult Education Centre (AEC)-rangna computer-rangko sualataha.
Ia ostrorangko, Salmanpara constituency-ni MLA Ian Botham K Sangma suale on·angaha aro ia ostrorangko suale on·anganio ua jinmana aganprakangengon, a·dokni chadamberangna bading chiwale cha·ani cholrangko on·na nangengani gimin aganangaha.
Ia sal somoirango pilak chadamberangnade sorkari kamrangko tikate on·na man·jawaha ine janapatengon, bading chiwale cha·ani cholrangko aro private company-rango kamrangko ka·na cholrangko sandiskachina Sangma didiangaha.
Chief Minister Conrad K Sangma-ni dilanichi ia sorkari, chadamberangna janggi tangani cholrangko on·na gita dingtang dingtang program aro scheme-rangko a·bachengate on·enga ineba ua aganaha.
Ia program-ko ong·atanio, dongpae jinmana aganprakanggipa gipin manderangara, Babelapara constituency-ni MDC Rakesh A Sangma, South West Garo Hills a·jani Additional Deputy Commissioner RZD Shira, South West Garo Hills a·jani District Animal Husbandry & Veterinary Officer Dr Violine A Sangma aro gipinrang ong·a.