AMPATI: Sorkarini ra·gatgipa dingtang dingtang scheme aro program-rangko nipilna gita Sombar salo, South West Garo Hills District Planning & Development Council (DPDC)-ni tom·aniko Ampati-ni Circuit House-o ong·ataha aro ia tom·anio, Salmanpara-ni MLA aro DPDC-ni Chairman Ian Botham K Sangma, Rangsakona-ni MLA aro DPDC-ni Member Subir M Marak baksana dingtang dingtang department-ni officer-rangba dongpae bak ra·angtokaha.
Ia tom·anio, Annual Plan 2026-2027-ni ning·o ka·enggipa a·dokni scheme-rangko nipilangengon, dingtang dingtang department-ni jako ra·e ka·enggipa kamrangni gimin, tangka paisarangko jakkalani gimin, kamrangni chu·sokengani gimin, kamrangko chu·sokatanio neng·nikanirangko chagrongna nangenggipani gimin aro kamrangko somoi gita matchotatna ja·ku de·anirangko department officer-rang, DPDC-ni Chairman aro Member-na agan-talate on·angtokaha.
Ia tom·anio, 2027-2028 bilsini Draft Annual Plan-ko tariani giminba DPDC chanchirimangaha aro dingtang dingtang department-rang, mikkang bilsiona department-ni nanganirang aro chamsogimin scheme-rangni bidingo DPDC-ni dilgiparangna agan-talate on·angtokaha.
Ia tom·anio, lekka pora, an·seng baljokani, gama ge·ani, songadam nokadamrango namroro silroroani, chirangko sokate on·ani, manderangni janggi tangani gadangko namdapatani aro uandakgipa kamrangkoba DPDC nipilangaha aro tangka paisarangko name jakkalna nangani aro manderangni namgnina kamrangko somoi gita chu·sokate on·na nangani gimin aganangaha.
Ia tom·anio, DPDC-ni Chairman aro Salmanpara-ni MLA Ian Botham K Sangma, ia tom·aniko ong·atani bidingo talate on·angengon, pangkamgipa namroro silroroaniko man·na gita kamrangko nambate chu·sokatna nangengani gimin aganangaha. Project-rangko somoi gita chu·sokatchina, manderangni tangka paisarangko name jakkalchina aro sorkarini ra·gate on·gipa scheme-rang, manderangona sokangna man·na gita kamrangko nirokjringchinaba Sangma, dingtang dingtang department-ni officer-rangko didiangaha.