હાલ દક્ષિણ ઝારખંડ અને તેની આસપાસના ઉત્તર આંતરિક ઓડિશા ઉપર સર્જાયેલું ડિપ્રેશન પશ્ચિમ-ઉત્તરપશ્ચિમ તરફ આગળ વધી રહ્યું છે અને આગામી 24 કલાક દરમિયાન ઝારખંડ, ઉત્તર છત્તીસગઢ તથા પૂર્વ મધ્યપ્રદેશ તરફ આગળ વધે તેવી શક્યતા છે. આ ઉપરાંત ઓફ-શોર ટ્રફ દક્ષિણ ગુજરાતથી ઉત્તર કેરળ સુધી સક્રિય છે, જ્યારે 3.1 થી 7.6 કિલોમીટર ઊંચાઈએ શીયર ઝોન પણ યથાવત રહેતા ભેજનું પ્રમાણ વધશે અને વરસાદી પ્રવૃત્તિને વેગ મળશે.

રાજ્યની આગાહી મુજબ મંગળવારથી ગુરુવાર દરમિયાન ઉત્તર ગુજરાત અને સૌરાષ્ટ્રના ઘણા વિસ્તારોમાં તેમજ દક્ષિણ ગુજરાતના મોટાભાગના વિસ્તારોમાં ગાજવીજ સાથે હળવાથી મધ્યમ વરસાદની સંભાવના છે. કચ્છમાં પણ અનેક સ્થળોએ વરસાદી ઝાપટાં પડવાની શક્યતા દર્શાવવામાં આવી છે. ત્યારબાદ 10 જુલાઈથી વરસાદની તીવ્રતામાં ધીમે ધીમે ઘટાડો થવાની શક્યતા છે, તેમ છતાં રાજ્યના વિવિધ વિસ્તારોમાં 13 જુલાઈ સુધી છૂટાછવાયા સ્થળોએ ગાજવીજ સાથે હળવાથી મધ્યમ વરસાદી માહોલ યથાવત રહેવાની આગાહી હવામાન વિભાગે કરી છે.