લાખો કર્મચારીઓની નજર અત્યારે આ બેઠક પર મંડાયેલી છે.

13 એપ્રિલે ડ્રાફ્ટિંગ કમિટીની ફાઈનલ મીટિંગ

13 એપ્રિલ, 2026 ના રોજ 'નેશનલ કાઉન્સિલ (જોઈન્ટ કન્સલ્ટેટિવ મશીનરી)' ની ડ્રાફ્ટિંગ કમિટી (ખરડા સમિતિ) એક મહત્ત્વપૂર્ણ બેઠક કરવા જઈ રહી છે. આ બેઠક એટલા માટે ખાસ છે કારણ કે તેમાં 8મા પગાર પંચને જે અંતિમ દરખાસ્તો (પ્રસ્તાવ) મોકલવાની છે, તેના પર ફાઈનલ ચર્ચા કરવામાં આવશે.

તૈયાર થઈ રહ્યું છે સંયુક્ત મેમોરેન્ડમ

ડ્રાફ્ટિંગ કમિટી અત્યારે કર્મચારીઓને લગતા તમામ મોટા પ્રશ્નો પર બારીકાઈથી કામ કરી રહી છે. તેઓ પગાર, પેન્શન અને નોકરીને લગતી અન્ય શરતોને આવરી લેતું એક 'સંયુક્ત મેમોરેન્ડમ' (આવેદન) તૈયાર કરી રહ્યા છે, જે સીધું જ 8મા પગાર પંચને સોંપવામાં આવશે. અગાઉ 12 માર્ચ, 2026 ના રોજ પણ આ સમિતિની એક ખાસ બેઠક મળી હતી, જેમાં અલગ-અલગ કર્મચારી અને પેન્શનર યુનિયનોએ આપેલા સૂચનો પર ગંભીરતાથી ચર્ચા થઈ હતી. હવે આ તમામ માહિતીને એકઠી કરીને એક મજબૂત ડ્રાફ્ટ બનાવવાનું કામ ચાલી રહ્યું છે.

2027 સુધીમાં લાગુ થઈ શકે છે નવો પગાર!

સરકારે ફેબ્રુઆરી 2026 માં જ સંસદમાં સ્પષ્ટ કરી દીધું હતું કે 8મા કેન્દ્રીય પગાર પંચની રચનાનું જાહેરનામું બહાર પાડી દેવામાં આવ્યું છે. 3 નવેમ્બર, 2025 ના ઠરાવ મુજબ, આ પંચને પોતાનો રિપોર્ટ અને ભલામણો સરકારને સોંપવા માટે 18 મહિનાનો સમય આપવામાં આવ્યો છે. પંચને મુખ્યત્વે કેન્દ્રીય કર્મચારીઓના બેઝિક પગાર, ભથ્થાં (જેમ કે DA, HRA) અને પેન્શનના નવા માળખા અંગે ભલામણો કરવાનું કામ સોંપાયું છે. જે રીતે કામ ચાલી રહ્યું છે, તે જોતાં અનુમાન છે કે 2027 ના વર્ષ સુધીમાં 8મું પગાર પંચ દેશભરમાં લાગુ થઈ જશે.

પગાર કેટલો વધશે? 'ફિટમેન્ટ ફેક્ટર' પર રહેશે નજર

સરકારી કર્મચારીઓનો પગાર કેટલો વધશે તેનો આખો આધાર 'ફિટમેન્ટ ફેક્ટર' (Fitment Factor) પર રહેલો છે, અને આ ફેક્ટર 8મું પગાર પંચ જ નક્કી કરશે. અત્યારે બજારમાં જે રીતે મોંઘવારી વધી રહી છે, તેને ધ્યાનમાં રાખીને કર્મચારી યુનિયનો માગ કરી રહ્યા છે કે ફિટમેન્ટ ફેક્ટર 3.25 અથવા તેનાથી વધુ રાખવામાં આવે. જોકે, ખરેખર પગારમાં કેટલો ઉછાળો આવશે તે તો પંચનો રિપોર્ટ આવશે ત્યારે જ સાફ થશે.

Author : gujarati.abplive.com