વડાપ્રધાન નરેન્દ્ર મોદીની અધ્યક્ષતામાં બુધવારે મળેલી આર્થિક બાબતોની કેબિનેટ સમિતિ (CCEA) ની બેઠકમાં લેવાયેલો આ નિર્ણય 1 એપ્રિલથી 30 સપ્ટેમ્બર 2026 સુધી અમલમાં રહેશે.

કેન્દ્રીય માહિતી અને પ્રસારણ મંત્રી અશ્વિની વૈષ્ણવે આ અંગેની વધુ વિગતો આપતા જણાવ્યું હતું કે, ગયા વર્ષની (એટલે કે ખરીફ 2025 ની) સરખામણીમાં આ વખતે સબસિડીમાં લગભગ 12 ટકા એટલે કે ₹4,317 કરોડનો વધારો કરવામાં આવ્યો છે.

સરકારે ખરીફ 2026 માટે પ્રતિ કિલોગ્રામ સબસિડીના નવા દર પણ નક્કી કરી દીધા છે, જે કંઈક આ મુજબ રહેશે:

નાઇટ્રોજન: ₹47.32

ફોસ્ફેટ: ₹52.76

પોટાશ: ₹2.38

સલ્ફર: ₹3.16

જો આપણે પાછલી રવી (2025-26) સીઝન સાથે સરખામણી કરીએ તો, સરકારે નાઇટ્રોજન, ફોસ્ફેટ અને સલ્ફર પર સબસિડીના દરમાં સારો એવો વધારો કર્યો છે. જોકે, પોટાશ માટેનો દર અગાઉની જેમ જ ₹2.38 યથાવત રાખવામાં આવ્યો છે.

તમને જણાવી દઈએ કે, આ બધી જ સબસિડી એપ્રિલ 2010 થી ચાલતી 'પોષણ આધારિત સબસિડી યોજના' (NBS) હેઠળ આપવામાં આવે છે, જેમાં 28 જેટલા ખાતરોનો સમાવેશ થાય છે. ભલે DAP, MOP અને NPK જેવા બિન-યુરિયા ખાતરોના છૂટક બજારભાવ કંપનીઓ જાતે નક્કી કરતી હોય, પણ સરકાર ખેડૂતોને પોસાય તે માટે તેના પર એક ફિક્સ સબસિડી આપે છે.

ખાતર સબસિડી પાછળ સરાકરનું કુલ ₹1,70,799 કરોડનું બજેટ

નાણાકીય વર્ષ 2026-27 માટે યુરિયા અને અન્ય ખાતરોની સબસિડી પાછળ સરકાર કુલ ₹1,70,799 કરોડનું માતબર બજેટ વાપરવાની છે, જેમાં ખરીફ 2026 અને રવી 2026-27 બંને સીઝન આવરી લેવાશે. આંતરરાષ્ટ્રીય બજારમાં ખાતરના ભાવમાં જે રીતે ઉતાર-ચઢાવ આવે છે, તેને ધ્યાનમાં રાખીને જ સરકારે આ નિર્ણય લીધો છે. ખાતર બનાવતી કંપનીઓને સરકાર દ્વારા નવા નક્કી કરેલા દરો મુજબ સીધી સબસિડી આપી દેવાશે, જેથી આપણા ખેડૂતો સુધી વાજબી ભાવે અને સમયસર ખાતર પહોંચી રહે.

Author : gujarati.abplive.com