SCO Summit 2026: પ્રધાનમંત્રી નરેન્દ્ર મોદી ઉઝબેકિસ્તાનનો બે દિવસનો રાજકીય પ્રવાસ પૂર્ણ કર્યા પછી રવિવારે (30 ઓગસ્ટ, 2026) રાત્રે પોતાના વિદેશ પ્રવાસના બીજા તબક્કામાં કિર્ગિસ્તાન પહોંચી ગયા છે. પીએમ મોદી આગામી બે દિવસ સુધી કિર્ગિસ્તાનની રાજધાની બિશ્કેકના પ્રવાસે રહેશે. આ દરમિયાન તેઓ બિશ્કેકમાં આયોજિત શાંઘાઈ સહયોગ સંગઠન (SCO)ની 26મી શિખર પરિષદમાં ભાગ લેશે.
આ સાથે જ તેઓ SCOના અનેક સભ્ય દેશોના નેતાઓ સાથે દ્વિપક્ષીય બેઠકો પણ કરશે.
બિશ્કેકમાં પીએમ મોદીનું ભવ્ય સ્વાગત કરાયું
પીએમ મોદીના બે દિવસીય કિર્ગિઝ રિપબ્લિકની રાજધાની બિશ્કેક પહોંચવા પર તેમનું ભવ્ય સ્વાગત કરવામાં આવ્યું હતું. કિર્ગિસ્તાનના મંત્રીમંડળના અધ્યક્ષ આદિલબેક કાસિમાલિયેવે એરપોર્ટ પર પહોંચીને પીએમ મોદીનું ઉષ્માભર્યું સ્વાગત કર્યું હતું. આ દરમિયાન એરપોર્ટ પર કિર્ગિસ્તાનની મહિલા નર્તકીઓ દ્વારા પીએમ મોદીના સ્વાગત માટે પરંપરાગત નૃત્ય રજૂ કરવામાં આવ્યું હતું. જે બાદ પીએમ મોદીએ કિર્ગિઝ મંત્રીમંડળના અધ્યક્ષ કાસિમાલિયેવનો આભાર માન્યો હતો.
...‘તે મને મારી નાખશે...’ તેજ પ્રતાપ યાદવનો ચોંકાવનારો દાવો, હની ટ્રેપમાં ફસાવી...
બિશ્કેકમાં ઉષ્માભર્યા સ્વાગત માટે પીએમ મોદીએ માન્યો આભાર
કિર્ગિસ્તાનની રાજધાની બિશ્કેક પહોંચ્યા પછી પીએમ મોદીએ પોતે સોશિયલ મીડિયા પ્લેટફોર્મ X પર એક પોસ્ટ શેર કરી હતી. પોતાની પોસ્ટમાં તેમણે કહ્યું, 'હમણાં થોડીવાર પહેલા જ બિશ્કેક પહોંચ્યો છું. બિશ્કેકમાં ઉષ્માભર્યા સ્વાગત માટે કિર્ગિઝ રિપબ્લિકના મંત્રીમંડળના અધ્યક્ષ આદિલબેક કાસિમાલિયેવનો ખૂબ ખૂબ આભાર.'
પીએમ મોદીએ ઉમેર્યું હતું કે, 'કાલે સોમવારે (31 ઓગસ્ટ, 2026) અને તેના પછીના દિવસે મંગળવારે (1 સપ્ટેમ્બર, 2026) વિવિધ દેશોના નેતાઓ સાથે દ્વિપક્ષીય બેઠકો થશે અને હું શાંઘાઈ સહયોગ સંગઠન (SCO)ની શિખર પરિષદમાં પણ ભાગ લઈશ.'
SCOની 25મી વર્ષગાંઠ પર બિશ્કેકમાં યોજાઈ રહી છે સમિટ
ઉલ્લેખનીય છે કે કિર્ગિસ્તાનની રાજધાની બિશ્કેકમાં આ 26મી SCO શિખર પરિષદ શાંઘાઈ સહયોગ સંગઠનની 25મી વર્ષગાંઠ નિમિત્તે યોજાઈ રહી છે, જેમાં ભારત વર્ષ 2017થી પૂર્ણ સભ્ય તરીકે સામેલ છે. પ્રધાનમંત્રી નરેન્દ્ર મોદી આ મહત્વપૂર્ણ બેઠકમાં ભાગ લેવાની સાથે સાથે શિખર પરિષદને સંબોધિત પણ કરશે, જ્યાં તેઓ આ મંચ દ્વારા સુરક્ષા, કનેક્ટિવિટી અને તકો અંગે ભારતની પ્રાથમિકતાઓને રેખાંકિત કરશે.
આ ઉપરાંત, પીએમ મોદી SCOના સભ્ય દેશોના નેતાઓ સાથે કેટલીક દ્વિપક્ષીય બેઠકો કરશે તેમજ સેન્ટ્રલ એશિયાના સમૃદ્ધ સાંસ્કૃતિક વારસાના ઉત્સવ એવા 6ઠ્ઠા વર્લ્ડ નોમાડ ગેમ્સના ઉદ્ઘાટન સમારોહમાં પણ હાજરી આપશે.
Author : gujarati.abplive.com