રાજકોટમાં ભાજપના મહિલા કોર્પોરેટરના પતિ સહિત પાંચ લોકો જુગાર રમતા ઝડપાયા હતા. લાખના બંગલા પાસે વંશરાજ એન્ટરપ્રાઈઝ નામની ઓફિસમાં ગાંધીગ્રામ પોલીસે દરોડા પાડ્યા હતા જ્યાંથી વોર્ડ નંબર 1ના ભાજપના મહિલા કોર્પોરેટર સેજલબેન ચૌધરીના પતિ અમિતરાજ ચૌધરી સહિત 5 જુગારીને જુગાર રમતા ઝડપી પાડવામાં આવ્યા હતા. ઉપરાંત અન્ય એક સ્થળે પણ દરોડા પાડી ચાર મહિલા સહિત 9 શખ્સોને તિનપત્તીનો જુગાર રમતા ઝડપી લીધા હતા.

રાજકોટ શહેરમાં કાયદો અને વ્યવસ્થાની સ્થિતિ જાળવી રાખવા માટે સ્થાનિક પોલીસ વિભાગ દ્વારા ગુનાખોરી અને ગેરકાયદે પ્રવૃત્તિઓ પર સતત વોચ રાખવામાં આવી રહી છે. આ દરમિયાન રાજકોટના ગાંધીગ્રામ પોલીસ સ્ટેશન વિસ્તારમાંથી એક અત્યંત ચોંકાવનારો કિસ્સો પ્રકાશમાં આવ્યો છે, જેણે સ્થાનિક રાજકીય વર્તુળોમાં ભારે ચર્ચા જગાવી છે. શહેરના લાખના બંગલા નજીક આવેલી વંશરાજ એન્ટરપ્રાઇઝ નામની પેઢીમાં ચાલતા જુગારધામ પર પોલીસે અચાનક દરોડો પાડીને કાર્યવાહી કરી છે.

ગાંધીગ્રામ પોલીસની ટીમને ગુપ્ત માહિતી મળી હતી કે લાખના બંગલા પાસેની એક ઓફિસમાં કેટલાક લોકો એકઠા થઈને ગેરકાયદેસર રીતે તીનપત્તીનો જુગાર રમી રહ્યા છે. આ બાતમીના આધારે પોલીસે દરોડો પાડ્યો હતો. આ દરોડા દરમિયાન સ્થળ પરથી વોર્ડ નંબર 1ના ભાજપના મહિલા કોર્પોરેટર સેજલબેન ચૌધરીના પતિ અમિતરાજ ચૌધરી સહિત કુલ પાંચ શખ્સોને જુગાર રમતા રંગેહાથ ઝડપી પાડવામાં આવ્યા હતા.

પોલીસના દરોડાથી ઘટનાસ્થળે ભારે અફરાતફરીનો માહોલ સર્જાયો હતો. પોલીસે સ્થળ પરથી રોકડ રકમ તેમજ અન્ય મુદ્દામાલ જપ્ત કરીને તમામ આરોપીઓની અટકાયત કરી છે. શાસક પક્ષના મહિલા કોર્પોરેટરના પતિ જ આ રીતે જુગાર રમતા પકડાતા સમગ્ર રાજકોટ શહેરમાં આ મુદ્દો ટોક ઓફ ધ ટાઉન બન્યો છે. ગાંધીગ્રામ પોલીસે આગળની તપાસ હાથ ધરી છે.

મોરબીમાં જુગાર રમતા કોંગ્રેસ- AAPના આગેવાન સહિત ચાર ઝડપાયા

મોરબીમાં કચ્છ રેન્જ આઈજીની ટીમે ઘુંટુ ગામે એક ઓફિસરમાં દરોડો પાડી જુગાર રમતા કોંગ્રેસ- AAPના આગેવાનો સહિત ચારને ઝડપી લીધા હતા. ઘુંટુ ગામની સીમમાં આવેલી રાધે કોલ એન્ટરપ્રાઈઝની ઓફિસમાં માહિતીના આધારે દરોડો પાડ્યો હતો. પોલીસના દરોડા સમયે જુગાર રમતા જગદીશભાઈ અઘારા, શૈલેષભાઈ ઉર્ફે કાળુભાઈ સનારીયા, યોગેશભાઈ પટેલ અને જયેશ કાલરિયાને જુગાર રમતા રંગેહાથ ઝડપી લીધા હતા. પોલીસે સ્થળ પરથી 1 લાખ 85 હજાર 300 રૂપિયાની રોકડ, 14 હજારની કિંમતના મોબાઈલ ફોન, સાડા ત્રણ લાખના વાહનો મળી કુલ 5 લાખ 24 હજારથી વધુનો મુદ્દામાલ કબ્જે કર્યો હતો. પોલીસની તપાસમાં ખૂલ્યું કે જયેશ કાલરિયાએ તાજેતરમાં યોજાયેલી મોરબી મહાપાલિકાની ચૂંટણીમાં કોંગ્રેસમાંથી વોર્ડ નં 9માં ઉમેદવારી કરી હતી. તો જગદીશ અઘારાએ આમ આદમી પાર્ટીમાંથી વોર્ડ નં 11માં ઉમેદવારી નોંધાવી હતી.

Author : gujarati.abplive.com