Vaibhav Suryavanshi Debut Controversy: આયર્લેન્ડ સામેની ટી20 સીરીઝની પહેલી મેચમાં વૈભવ સૂર્યવંશીને પ્લેઈંગ 11 માં જગ્યા મળશે, એવું માનવામાં આવતું હતું. પરંતુ કોચ અને કેપ્ટને પહેલાથી જ પર્ફોર્મ કરતા આવી રહેલા ખેલાડીઓ પર ભરોસો મૂક્યો. પહેલા મુકાબલામાં ભારતની કારમી હાર પછી એ સાફ હતું કે પ્લેઈંગ 11 માં ફેરફાર થશે, જેથી આશા જાગી કે વૈભવને રમાડવામાં આવી શકે છે.

વૈભવ સૂર્યવંશીના ડેબ્યૂની કેમ થઈ રહી છે માંગ

વૈભવ સૂર્યવંશીને રાજસ્થાન રોયલ્સે જ્યારે ગયા વર્ષે ખરીદ્યો હતો, ત્યારે તેની ઉંમર માત્ર 13 વર્ષની હતી. ઉંમર સાચી છે કે ખોટી? આ બાબતને લઈને ઘણો વિવાદ થયો હતો અને તે બસ આ જ કારણે ચર્ચામાં રહ્યો હતો, પરંતુ જ્યારે તે RR માટે રમ્યો ત્યારે દરેક મેચની સાથે મોટા-મોટા રેકોર્ડ તોડતો ગયો. પોતાની પહેલી જ સીઝનમાં તેણે 35 બોલમાં સદી ફટકારીને ઈતિહાસ રચ્યો, તે IPL માં બીજી સૌથી ફાસ્ટ સદી ફટકારનારો બેટ્સમેન બની ગયો. આ પછી તેણે ડોમેસ્ટિક, ઈન્ડિયા એ, અંડર-19 ટીમ માટે શાનદાર રમત ચાલુ રાખી.

...IND vs ENG: ભારત-ઈંગ્લેન્ડ ટી20 સીરીઝ ક્યારથી શરુ થશે, અહીં જુઓ 5 મેચનું સંપૂર્ણ શેડ્યૂલ

ટી20 એવો ફોર્મેટ છે, જ્યાં બેટ્સમેનોને પહેલા બોલથી જ હિટિંગ કરવાની છૂટ હોય છે. વૈભવ આવી જ રીતે રમે છે, પરંતુ તેને જે વસ્તુ અલગ બનાવે છે તે એ છે કે તે સતત સારું પ્રદર્શન કરતો આવી રહ્યો છે. IPL 2026 માં તે સૌથી વધુ રન બનાવનારો બેટ્સમેન રહ્યો, ઓરેન્જ કેપની સાથે તેણે ઘણા એવોર્ડ્સ જીત્યા. તેમાં એક સીઝનમાં સૌથી વધુ સિક્સર ફટકારવાનો એવોર્ડ પણ સામેલ હતો, તેણે 72 સિક્સ ફટકારીને ઈતિહાસ રચ્યો હતો. આ સીઝનમાં લોકોને તેની એક વસ્તુ વધુ પસંદ આવી કે તે માત્ર એટેકિંગ જ નહીં પરંતુ પરિસ્થિતિ અનુસાર રોકાઈને પણ રમી શકે છે.

વૈભવ સૂર્યવંશીએ પ્લેઓફની બંને મેચોમાં શાનદાર બેટિંગ કરી હતી, પરંતુ બંનેમાં સદી ચૂક્યો હતો. એલિમિનેટરમાં 97 અને ક્વોલિફાયર-2 માં 96 રનની તોફાની ઇનિંગ રમી હતી. આ પછી તે ઈન્ડિયા એ સાથે શ્રીલંકાના પ્રવાસે ગયો, જ્યાં વનડે ફોર્મેટમાં રમાયેલી ટ્રાય-સીરીઝની ફાઇનલમાં તેણે 29 બોલમાં 94 રનની ઐતિહાસિક ઇનિંગ રમી હતી. જેમાં તેણે 11 બોલમાં હાફ સેન્ચુરી ફટકારી હતી. વૈભવ કઈ હદે છવાયેલો છે, તેનો અંદાજો તમે એ વાત પરથી લગાવી શકો છો કે ઈંગ્લેન્ડના પૂર્વ કેપ્ટન માઈકલ વોને તેને વર્તમાન સમયમાં ટી20 નો સર્વશ્રેષ્ઠ ખેલાડી ગણાવ્યો છે.

ગૌતમ ગંભીર પર ઉઠ્યા આ 5 સવાલો

1. ટોપ ઓર્ડર ફ્લોપ થવા છતાં પણ કેમ જગ્યા ન આપી? સૌથી મોટો સવાલ એ છે કે જ્યારે તમે જોયું કે પહેલી મેચમાં તમારા ટોપ ઓર્ડરના બેટ્સમેન ફ્લોપ રહ્યા, તો પછી વૈભવને બીજી મેચમાં તક કેમ ન આપવામાં આવી. કારણ કે દિગ્ગજોથી લઈને લોકોની પણ માંગ આ જ છે, જો તેમને રમાડીને તમે હાર્યા પણ હોત તો તમારે આલોચનાનો ભોગ બનવું પડત નહીં.
2. પ્રસિદ્ધ અને વોશિંગ્ટનને કેમ ડ્રોપ કર્યા? જો તમે તમારા જૂના ખેલાડીઓને સતત તક આપવા માંગતા હોવ તો પછી આ દ્રષ્ટિએ પ્રસિદ્ધ ક્રિષ્ના અને વોશિંગ્ટન સુંદરને કેમ ડ્રોપ કરવામાં આવ્યા. કારણ કે પહેલી મેચમાં માત્ર આ બંનેની ભૂલથી તો આપણે મેચ નહોતા હાર્યા.
3. બે ખેલાડીઓને તક, છતાં વૈભવ સૂર્યવંશી કેમ નહીં? વૈભવ સૂર્યવંશીને લઈને તમે એવું ઈચ્છો છો કે પહેલી સીઝનમાં તેને માત્ર ટીમ સાથે સેટ થવા દેવામાં આવે, મેદાન પર ન ઉતારવામાં આવે તો પછી આ વાત તો સૂર્યાંશ શેડગે પર પણ લાગુ થાય છે. તેની પણ આ નેશનલ ટીમ સાથે પહેલી જ સીઝન હતી.
4. સૂર્યાંશની જગ્યાએ વૈભવ સૂર્યવંશીનું ડેબ્યૂ ન થઈ શક્યું હોત? સૂર્યાંશ શેડગે જમણા હાથનો બેટ્સમેન છે, જેને તમે વોશિંગ્ટન સુંદરની જગ્યાએ રમાડ્યો. તેનો પ્લસ પોઈન્ટ માત્ર એટલો જ હતો કે તે બોલિંગ કરી શકે છે, પરંતુ આપણે જોયું કે તે પોતાની 2 ઓવરોમાં મોંઘો સાબિત થયો. જોયું જાય તો પહેલી મેચમાં પણ ટાર્ગેટ કંઈ બહુ મોટો નહોતો, હાર બેટ્સમેનોના કારણે થઈ હતી. જો તમે વોશિંગ્ટનને હટાવીને કોઈ બીજાને લાવવા માંગતા હતા તો તે વૈભવ સૂર્યવંશી કેમ ન હોઈ શકે.
5. શું માત્ર ઓપનિંગ જ કરી શકે છે વૈભવ સૂર્યવંશી? એક મોટો સવાલ એ પણ ઉઠી રહ્યો છે કે શું વૈભવ સૂર્યવંશી માત્ર ઓપનિંગ જ કરી શકે છે? જો ટીમમાં તમે ઓપનર્સને બદલવા નથી માંગતા તો શું ગૌતમ ગંભીર વૈભવને નંબર-3 માટે તૈયાર ન કરી શકે. અત્યારે વૈભવ શાનદાર પ્રદર્શન કરી રહ્યો છે, ટીમ ઈન્ડિયાને તેની જરૂર છે તો તેને વહેલી તકે મેદાન પર ઉતારવો જોઈએ.

Author : gujarati.abplive.com