રેલીનો પ્રારંભ સવારે શહેર વર્તુળ કચેરી, નાના મવા રોડ ખાતેથી થયો હતો. ત્યારબાદ રેલી નાના મવા મેઈન રોડ, રાજનગર ચોક, પંડિત દીનદયાળ ઉપાધ્યાય માર્ગ, અમીન માર્ગ, પંચાયતી મુખ્ય માર્ગ, અતિથિ ચોક અને લક્ષ્‍મીનગર ચોક સહિતના મુખ્ય માર્ગો પરથી પસાર થઈ ફરી શહેર વર્તુળ કચેરી ખાતે સમાપ્ત થઈ હતી.

રેલી દરમિયાન વિજ સલામતી અંગેના વિવિધ સૂત્રો, બેનરો અને સંદેશાઓ દ્વારા લોકોને વીજ ઉપકરણોનો સાવચેતીપૂર્વક ઉપયોગ કરવા, ખુલ્લા વીજ તારોથી દૂર રહેવા, વરસાદી ઋતુમાં વીજ અકસ્માતોથી બચવા તેમજ વીજ સંબંધિત જોખમોની તાત્કાલિક જાણ વીજ વિભાગને કરવા અંગે માર્ગદર્શન આપવામાં આવ્યું હતું.

કાર્યક્રમમાં વીજ કંપનીના અધિકારીઓ, કર્મચારીઓ, વિવિધ વિભાગોના પ્રતિનિધિઓ તેમજ મોટી સંખ્યામાં નાગરિકોએ ઉત્સાહપૂર્વક ભાગ લીધો હતો. રેલી દરમિયાન શહેરના વિવિધ વિસ્તારોમાં લોકોને વિજ સલામતીના નિયમોનું પાલન કરવા અપીલ કરવામાં આવી હતી.

વિજ સલામતી સપ્તાહ દરમિયાન વિવિધ જાગૃતિ કાર્યક્રમો, માર્ગદર્શન અને જનસંપર્ક અભિયાન દ્વારા નાગરિકોમાં સલામતી અંગે જાગૃતિ લાવવાનો પ્રયાસ કરવામાં આવ્યો હતો. સમાપન દિવસે યોજાયેલી આ રેલી દ્વારા સુરક્ષિત વીજ વપરાશનો સંદેશ વ્યાપક રીતે લોકો સુધી પહોંચાડવામાં આવ્યો હતો.