પોલીસે શુભદીપ સિંહ, ગુરજંત સિંહ, સાજન સિંહ અને ગગનપ્રીત નામના ચાર આરોપીઓની ધરપકડ કરી છે. આ તમામ આરોપીઓ પાકિસ્તાન સ્થિત આઈએસઆઈ હેન્ડલર શહઝાદ ભટ્ટી અને તેના સહયોગીઓના ઇશારે કામ કરતા હતા. તપાસમાં સામે આવ્યું છે કે, આ આતંકવાદીઓ પોતાની ઓળખ છુપાવવા માટે પાકિસ્તાની હેન્ડલરો દ્વારા પૂરા પાડવામાં આવેલા વિદેશી મોબાઈલ નંબરોનો ઉપયોગ કરતા હતા.

દિલ્હી પોલીસના સ્પેશિયલ સેલને મળેલા વિશ્વસનીય ઇનપુટ બાદ દિલ્હી અને પંજાબમાં સઘન દરોડા પાડવામાં આવ્યા હતા. સૌપ્રથમ અમૃતસરથી શુભદીપ સિંહની ધરપકડ કરવામાં આવી હતી,

જેની પાસેથી પિસ્તોલ અને દારૂગોળો મળી આવ્યો હતો. પૂછપરછમાં તેણે ડ્રોન મારફતે સરહદ પારથી શસ્ત્રો અને ડ્રગ્સ મેળવવાની કબૂલાત કરી હતી. ત્યારબાદ, તેના અન્ય બે સહયોગીઓ ગુરજંત અને સાજનને પંજાબમાંથી પકડી પાડવામાં આવ્યા હતા. અંતિમ કડી તરીકે 24 એપ્રિલ, 2026 ના રોજ ગગનપ્રીતની દિલ્હીથી ધરપકડ કરવામાં આવી હતી. આ તમામ આરોપીઓ પાસેથી બે વિદેશી પિસ્તોલ, નવ જીવંત કારતૂસ અને પાંચ મોબાઇલ ફોન જપ્ત કરવામાં આવ્યા છે.

આ આતંકવાદી મોડ્યુલમાં ગગનપ્રીતની ભૂમિકા ખૂબ જ ગંભીર હતી.

તેને આઈએસઆઈ હેન્ડલરો દ્વારા દિલ્હીમાં પોલીસ સ્ટેશનો અને મહત્વના ધાર્મિક સ્થળોની જાસૂસી કરવાનું કામ સોંપવામાં આવ્યું હતું. માત્ર જાસૂસી જ નહીં, પરંતુ તેને ભીડભાડવાળા વિસ્તારો કે ધાર્મિક સ્થળોએ ગોળીબાર કરવાની પણ સ્પષ્ટ સૂચના આપવામાં આવી હતી.