કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીએ એક પત્રકાર પરિષદમાં આ અંગેની સત્તાવાર અને વિગતવાર માહિતી આપી છે.

કેન્દ્રીય મંત્રી હરદીપ સિંહ પુરીએ જણાવ્યું હતું કે, આંતરરાષ્ટ્રીય સ્તરે ક્રૂડ ઓઈલના ભાવ આસમાને પહોંચ્યા હોવા છતાં, સરકારે ભારતીય ગ્રાહકોને મોંઘવારીના મોટા ફટકાથી બચાવવા માટે સ્થાનિક બજારમાં પેટ્રોલ અને ડીઝલના ભાવમાં તે પ્રમાણમાં વધારો થવા દીધો ન હતો. ઓઈલ કંપનીઓએ પડતર કિંમત કરતાં ઘણા નીચા ભાવે ઈંધણનું વેચાણ ચાલુ રાખ્યું હતું. આ ગાળા દરમિયાન કંપનીઓએ ડીઝલ પર ₹1.44 લાખ કરોડ, પેટ્રોલ પર ₹19,905 કરોડ અને રાંધણ ગેસ પર ₹24,148 કરોડની કુલ 'અંડર-રીકવરી' (પડતર કિંમત અને વેચાણ કિંમત વચ્ચેનો તફાવત) નો સામનો કરવો પડ્યો છે, જેમાં એપ્રિલ-જૂનના ત્રિમાસિક ગાળાનું ચોખ્ખું નુકસાન ₹74,781 કરોડ રહ્યું છે.

હાલમાં આંતરરાષ્ટ્રીય બજારમાં બ્રેન્ટ ક્રૂડના ભાવ ઘટીને બેરલ દીઠ 70 ડોલરની આસપાસ એટલે કે ચાર મહિનાની નીચી સપાટીએ પહોંચી ગયા છે, તેમ છતાં ભારતમાં પેટ્રોલ-ડીઝલ સસ્તું થવાની કોઈ શક્યતા નથી. આ પાછળનું ટેકનિકલ કારણ આપતાં મંત્રીએ સ્પષ્ટ કર્યું કે, ઓઈલ રિફાઈનરીઓ સામાન્ય રીતે 1 થી 2 મહિના અગાઉથી ક્રૂડ ઓઈલનો ઓર્ડર આપતી હોય છે. આથી, હાલમાં ભારતીય કંપનીઓ જે ક્રૂડ ઓઈલ પ્રોસેસ કરી રહી છે, તે એપ્રિલ અને મે મહિનામાં યુદ્ધના પીક સમયગાળા દરમિયાન ઊંચા ભાવે અને મોંઘા નૂર ભાડા સાથે ખરીદવામાં આવ્યું હતું. જ્યાં સુધી આ મોંઘા સ્ટોકનો નિકાલ ન થાય ત્યાં સુધી કંપનીઓ ભાવ ઘટાડી શકે તેમ નથી.