સંયુક્ત રાષ્ટ્ર મહાસભા (UNGA)ના સત્ર દરમિયાન ભારતીય રાજદ્વારી રઘુ પુરી (Raghoo Puri)એ આ રિપોર્ટ પર વાંધો ઉઠાવતાં કહ્યું હતું કે કોઈ પણ જવાબદારી વગર તથ્યાત્મક રીતે ખોટો રિપોર્ટ જાહેર કરવો એ ખૂબ જ ગંભીર ચિંતાનો વિષય છે.

તથ્યોની ખોટી માહિતી આપવી સ્વીકાર્ય નથી

સંયુક્ત રાષ્ટ્રમાં ભારતે આતંકવાદના મુદ્દે ફરી એક વાર પાકિસ્તાનને ફટકાર લગાવી છે. ભારતના ફર્સ્ટ સેક્રેટરી રઘુ પુરીએ જણાવ્યું હતું કે સંયુક્ત રાષ્ટ્રના રિપોર્ટમાં તથ્યોની ખોટી માહિતી આપવી સ્વીકાર્ય નથી. રઘુ પુરીએ કહ્યું કે દાઉદ ઇબ્રાહિમ ૧૯૯૩થી ભારતમાં થયેલા આતંકવાદી હુમલાના કેસમાં વોન્ટેડ છે અને સંયુક્ત રાષ્ટ્રની પ્રતિબંધિત યાદીમાં પણ તેનો ઉલ્લેખ છે.

તેમણે ઉમેર્યું હતું કે દાઉદ એ જ દેશમાં રહે છે જ્યાં ઓસામા બિન લાદેન મળ્યો હતો અને તેને ઠાર કરવામાં આવ્યો હતો. ભારતે કહ્યું હતું કે માનવાધિકારોને નામે આતંકવાદીઓ અને કટ્ટરપંથને પ્રોત્સાહન આપનારાઓને બચાવી શકાય નહીં. આતંકવાદને કોઈ પણ સંજોગોમાં વાજબી ઠેરવી શકાય નહીં. પાકિસ્તાન પર નિશાન સાધતાં તેમણે કહ્યું કે તેનું નિવેદન માત્ર રાજકીય લાભ માટે કરવામાં આવેલો પ્રચાર છે અને તેની પાછળ પાકિસ્તાની સેનાનાં હિતો રહેલાં છે.