પાકિસ્તાન ક્રિકેટ બોર્ડ (PCB)ના જણાવ્યા અનુસાર અબ્દુલ્લા ફઝલને બ્રાયન લારા ક્રિકેટ અકાદમી ખાતે પ્રેક્ટિસ સેશન દરમિયાન ઈજા થઈ હતી. ત્યારબાદ તેનો એમઆરઆઈ સ્કેન કરવામાં આવ્યો, જેમાં લોવર બેક ઈજાની પુષ્ટિ થઈ. ડૉક્ટરોની સલાહ બાદ તેને તરત જ રિહેબિલિટેશન માટે મોકલવામાં આવ્યા છે, જેના કારણે તેઓ માત્ર વેસ્ટ ઇન્ડિઝ સામેની ટેસ્ટ સિરીઝ જ નહીં પરંતુ આગામી ઇંગ્લેન્ડ પ્રવાસમાંથી પણ બહાર થઈ ગયા છે.

23 વર્ષીય ડાબોડી બેટ્સમેન અબ્દુલ્લા ફઝલે આ વર્ષે બાંગ્લાદેશ સામે ટેસ્ટ ક્રિકેટમાં ડેબ્યૂ કર્યું હતું. તેણે પોતાની પ્રથમ બે ટેસ્ટમાં કુલ 141 રન બનાવ્યા હતા અને બંને ઇનિંગ્સમાં અડધી સદી ફટકારીને પસંદગીકારો તેમજ ક્રિકેટ ચાહકોનું ધ્યાન ખેંચ્યું હતું. વેસ્ટ ઇન્ડિઝ સિલેક્ટ ઇલેવન સામેની વોર્મ-અપ મેચમાં પણ તેણે અનુક્રમે 50 અને અણનમ 48 રનની ઉપયોગી ઇનિંગ્સ રમી હતી.

ફઝલની ગેરહાજરીથી પાકિસ્તાનના ટોપ ઓર્ડરની મજબૂતી પર અસર પડી શકે છે. ટીમ મેનેજમેન્ટ હવે તેના સ્થાને કોને તક આપવામાં આવશે તે અંગે ટૂંક સમયમાં નિર્ણય લેશે. PCBએ જણાવ્યું છે કે વેસ્ટ ઇન્ડિઝ સિરીઝ અને ત્યારબાદના ઇંગ્લેન્ડ પ્રવાસ માટે તેમના સ્થાને નવા ખેલાડીની જાહેરાત જલ્દી કરવામાં આવશે. હવે બાબર આઝમની આગેવાની હેઠળની ટીમ આ મહત્વપૂર્ણ ટેસ્ટ સિરીઝમાં આ પડકારને કેવી રીતે પાર કરે છે તેના પર સૌની નજર રહેશે.