આ ઘટનાએ કર્ણાટકમાં કથિત ગુપ્ત રેકોર્ડિંગને લઈને ચાલી રહેલા રાજકીય વિવાદમાં નવા પ્રશ્નો ઊભા કર્યા છે. કન્નડ ન્યૂઝ ચેનલ 'એશિયાનેટ સુવર્ણ ન્યૂઝ'ને આપેલા એક ઇન્ટરવ્યુમાં શિવકુમારે દાવો કર્યો કે, એક ઉદ્યોગપતિ સાથેની મુલાકાત દરમિયાન તેમના અસામાન્ય વર્તનને કારણે તેમને શંકા ગઈ કે કદાચ ગુપ્ત રીતે રેકોર્ડિંગ કરવામાં આવી રહ્યું છે. તેમણે વધુમાં આરોપ લગાવ્યો કે, તે જ વ્યક્તિએ કોંગ્રેસના અન્ય નેતા અને કેરળના મુખ્યમંત્રી વી.ડી. સતીશન સાથે મુલાકાત કરતી વખતે પણ એ જ સ્માર્ટ ગ્લાસીસ પહેર્યા હતા.

કર્ણાટકના મુખ્યમંત્રીના આ નિવેદને પૂર્વ મુખ્યમંત્રી સિદ્ધારમૈયા સાથે જોડાયેલા કથિત 'સ્ટિંગ ઓપરેશન'ના વીડિયોના વિવાદમાં એક નવો વળાંક આપ્યો છે. જોકે, શિવકુમારે હજુ સુધી તે ઉદ્યોગપતિનું નામ જાહેર કર્યું નથી કે એવો કોઈ પુરાવો પણ રજૂ કર્યો નથી જેનાથી સાબિત થાય કે ખરેખર રેકોર્ડિંગ કરવામાં આવ્યું હતું.

ડી.કે. શિવકુમારે શું કહ્યું?

શિવકુમારના જણાવ્યા અનુસાર, તે ઉદ્યોગપતિએ સરકારી અધિકારીઓ મારફતે તેમની સાથે મુલાકાત ગોઠવી હતી અને શરૂઆતમાં વ્યવસાયિક બાબતો પર ચર્ચા કરી હતી. પરંતુ, વાતચીત ધીમે ધીમે રાજકીય મુદ્દાઓ તરફ વળી, જેમાં બૂથ-સ્તરની રણનીતિઓ અને રાજકીય ક્ષેત્રની અન્ય ઘટનાક્રમોનો સમાવેશ થતો હતો. કર્ણાટકના મુખ્યમંત્રીએ કહ્યું કે, તે વ્યક્તિએ અચાનક રાજકીય ચર્ચાઓમાં રસ દાખવ્યો અને તેણે મેટા સ્માર્ટ ગ્લાસીસ પહેરેલા હતા, જેના કારણે તેમને આ મુલાકાતના હેતુ પર શંકા ગઈ.

ત્યારબાદ શિવકુમારે અધિકારીઓને તે ઉદ્યોગપતિની પૃષ્ઠભૂમિ અને તેની હિલચાલની તપાસ કરવા કહ્યું. શિવકુમારે 'એશિયાનેટ સુવર્ણ ન્યૂઝ'ને જણાવ્યું, "મેં મારા અધિકારીઓને તે ઉદ્યોગપતિની પૃષ્ઠભૂમિ વિશે તપાસ કરવા કહ્યું હતું."

તપાસ દરમિયાન મળેલી માહિતીથી એક એવો ઘટનાક્રમ સામે આવ્યો જેનાથી તેમની શંકા વધુ ઘેરી બની. શિવકુમારે દાવો કર્યો કે, તે વ્યક્તિએ કેરળના મુખ્યમંત્રી વી.ડી. સતીશન સાથેની મુલાકાત વખતે પણ એ જ સ્માર્ટ ગ્લાસીસ પહેર્યા હતા. જોકે, આંધ્રપ્રદેશના મુખ્યમંત્રી ચંદ્રબાબુ નાયડુ, મહારાષ્ટ્રના મુખ્યમંત્રી દેવેન્દ્ર ફડણવીસ અને એક કેન્દ્રીય મંત્રી સાથેની મુલાકાત વખતે તેણે આ ચશ્મા પહેર્યા ન હતા. શિવકુમારે દાવો કર્યો, "તેણે માત્ર વી.ડી. સતીશન અને મારી સાથે મુલાકાત વખતે જ મેટા ગ્લાસીસ પહેર્યા હતા."

કર્ણાટકના મુખ્યમંત્રીએ એ સ્પષ્ટ કર્યું નથી કે તપાસમાં તે ચશ્મા વિશે શું જાણવા મળ્યું અથવા અધિકારીઓને કોઈ રેકોર્ડિંગ મળ્યું છે કે કેમ. તે ઉદ્યોગપતિ કોણ છે અને આ કથિત પ્રયાસ પાછળના સંજોગો શું હતા, તે હજુ સુધી જાહેર કરવામાં આવ્યું નથી. મુખ્યમંત્રીએ કહ્યું કે સાવચેતીના પગલાં લેવામાં આવ્યા હતા

આ કથિત ઘટનામાં સંડોવાયેલા લોકો સામે કોઈ કાર્યવાહી કેમ કરવામાં આવી નથી, તેવા પ્રશ્નના જવાબમાં શિવકુમારે સંકેત આપ્યો કે સત્તાવાળાઓએ પહેલેથી જ પગલાં લઈ લીધા છે, પરંતુ તેની વિગતો ગુપ્ત રાખવામાં આવી છે. કર્ણાટકના મુખ્યમંત્રીએ એક મુલાકાતમાં કહ્યું, "કોણે કહ્યું કે કાર્યવાહી કરવામાં આવી નથી? તમને બસ ખબર નથી, એટલું જ… અમે તેનો ખુલાસો કરી રહ્યા નથી, બસ એટલું જ. અમે તમામ સાવચેતીના પગલાં લીધાં છે." શિવકુમારે એવો પણ દાવો કર્યો કે આ કથિત પ્રયાસ પાછળ કોણ હતું તે તેઓ જાણે છે અને તેમની પાસે પોતાની વાત સાબિત કરવા માટે પુરાવા (રેકોર્ડ્સ) પણ છે. જોકે, તેમણે શંકાસ્પદ વ્યક્તિઓના નામ જાહેર કર્યા નહીં કે તે પુરાવા સાર્વજનિક કર્યા નહીં.

તેમણે કહ્યું કે આ ઘટનાને પગલે તેમણે પોતાના કેબિનેટ સહયોગીઓને સાવચેત કર્યા છે કે રાજકીય નેતાઓને ફસાવવાના પ્રયાસના ભાગરૂપે, કોઈ વ્યક્તિ તેમના અંગત સહાયકો (PAs), ફોન કોલ્સ કે અન્ય માધ્યમો દ્વારા તેમનો સંપર્ક કરવાનો પ્રયાસ કરી શકે છે.

સિદ્ધારમૈયાના 'સ્ટિંગ વીડિયો' વિવાદ વચ્ચે નવા આક્ષેપો સામે આવ્યા

'મેટા ગ્લાસીસ' (Meta glasses) અંગેનો આ આક્ષેપ એવા સમયે સામે આવ્યો છે જ્યારે કર્ણાટકના રાજકીય વર્તુળોમાં પૂર્વ મુખ્યમંત્રી સિદ્ધારમૈયા સાથે જોડાયેલા કથિત 'સ્ટિંગ ઓપરેશન'ના ફૂટેજને લઈને વિવાદ ચાલી રહ્યો છે. આ વિવાદને કારણે કોંગ્રેસ અને વિરોધ પક્ષો વચ્ચે સામસામે દાવાઓ થઈ રહ્યા છે-જેમાં વીડિયો ક્યાંથી આવ્યા, તેને રેકોર્ડ કરવા કે ફેલાવવા પાછળ કોણ જવાબદાર છે અને તેની રાજકીય અસરો શું હોઈ શકે, તે અંગે ચર્ચાઓ થઈ રહી છે.

ભારતીય જનતા પાર્ટી (ભાજપ) એ આ મામલામાં વધુ પારદર્શિતાની માંગ કરી છે, જ્યારે જેડી(એસ)ના વડા એચ.ડી. કુમારસ્વામીએ સ્વતંત્ર તપાસની માંગ કરી છે. બીજી તરફ, કોંગ્રેસે ભારપૂર્વક કહ્યું છે કે શિવકુમાર સામેના આ આક્ષેપો રાજકીય પ્રેરિત છે.