Dhandhuka Accident News: અમદાવાદ જિલ્લાના ધંધુકા નજીક આવેલા રાણપુર રોડ પર આજે વહેલી સવારે એક ગમખ્વાર અકસ્માત સર્જાયો હતો. કિસાન જીન પાસે એક ટ્રક અને કાર વચ્ચે થયેલી આ ભયાનક ટક્કરમાં કારનો કચ્ચરઘાણ નીકળી ગયો હતો. અકસ્માત એટલો ગંભીર હતો કે કારના ચીથરા ઉડી ગયા હતા, જેના કારણે એક યુવકનું ઘટનાસ્થળે જ કરુણ મોત નિપજ્યું હતું.

અકસ્માતમાં એકનું મોત, ત્રણ ગંભીર રીતે ઘાયલ

મળતી માહિતી મુજબ, આ અકસ્માતમાં કારમાં સવાર મોહનભાઈ પરબતભાઈ વાસણ નામના યુવકે પોતાનો જીવ ગુમાવ્યો છે. આ ઉપરાંત, કારમાં સવાર અન્ય ત્રણ સભ્યો – લક્ષ્‍મીબેન મોહનભાઈ વાસણ, જસ્મીન મોહનભાઈ વાસણ અને ચિરાગભાઈ ગંભીર રીતે ઈજાગ્રસ્ત થયા છે. ઘટનાની જાણ થતાં જ આસપાસના લોકો દોડી આવ્યા હતા અને 108 ઇમરજન્સી સેવાને જાણ કરવામાં આવી હતી. તમામ ઈજાગ્રસ્તોને તાત્કાલિક ધંધુકાની RMS હોસ્પિટલમાં સારવાર માટે ખસેડવામાં આવ્યા છે.

પોલીસ તપાસ શરૂ

અકસ્માતને પગલે રોડ પર લાંબો ટ્રાફિક જામ સર્જાયો હતો. ધંધુકા પોલીસ ઘટનાસ્થળે પહોંચીને ટ્રાફિકને પૂર્વવત કરાવ્યો હતો અને મૃતદેહને પોસ્ટમોર્ટમ માટે ખસેડી આગળની કાર્યવાહી હાથ ધરી છે. પોલીસે આ મામલે ગુનો નોંધીને અકસ્માત માટે જવાબદાર ટ્રક ચાલક અને અકસ્માતના ચોક્કસ કારણો જાણવા માટે વધુ તપાસ શરૂ કરી છે.