Sonal Dinusha Record : ભારત (India) સામેની ટેસ્ટ સિરીઝ (Test Series)માં શ્રીલંકાના યુવા બેટર (Young Batter) સોનલ દિનુષા (Sonal Dinusha)એ શાનદાર બેટિંગ કરીને ખાસ રેકોર્ડ (Record) પોતાના નામે કર્યો છે. 2 મેચોની ટેસ્ટ સિરીઝની ચારેય ઇનિંગ્સમાં 50 કે તેથી વધુ રન બનાવનાર દિનુષા ભારત સામે આવું કરનાર પ્રથમ શ્રીલંકન બેટર બન્યો છે.
ગોલથી કોલંબો સુધી દિનુષાનો જલવો
ભારત અને શ્રીલંકા (India vs Sri Lanka) વચ્ચે રમાઈ રહેલી ટેસ્ટ સિરીઝમાં સોનલ દિનુષાએ સતત પોતાના બેટથી પ્રભાવ પાડ્યો છે. ગાલે ટેસ્ટ (Galle Test)માં તેણે પ્રથમ ઇનિંગ્સમાં શાનદાર 100 રન ફટકાર્યા હતા. ત્યારબાદ બીજી ઇનિંગ્સમાં પણ તેણે 84 રનની મહત્વપૂર્ણ ઇનિંગ રમી હતી. ત્યારબાદ કોલંબોના સિંહલીજ સ્પોર્ટ્સ ક્લબ (SSC) ખાતે રમાયેલી બીજી ટેસ્ટમાં પણ દિનુષાનું શાનદાર ફોર્મ યથાવત રહ્યું. તેણે શ્રીલંકાની પ્રથમ ઇનિંગ્સમાં 103 રન બનાવ્યા હતા અને ત્યારબાદ બીજી ઇનિંગ્સમાં પણ 50થી વધુ રન બનાવીને અનોખી સિદ્ધિ મેળવી હતી. આ સાથે દિનુષા ભારત સામે પોતાની પ્રથમ 4 ટેસ્ટ ઇનિંગ્સમાં સતત 50+ રન બનાવનાર શ્રીલંકાનો પ્રથમ બેટર બન્યો છે.
ભારત સામે પ્રથમ 4 ટેસ્ટ ઇનિંગ્સમાં 50+ રન
દિનુષાની આ સિદ્ધિ વધુ ખાસ એટલા માટે છે કે ભારત સામે પોતાની પ્રથમ 4 ટેસ્ટ ઇનિંગ્સમાં 50 કે તેથી વધુ રન બનાવનાર તે વિશ્વનો પાંચમો બેટર છે. આ યાદીમાં ક્રિકેટના દિગ્ગજ ડગ્લસ જાર્ડિન (Douglas Jardine), એવરટન વીક્સ (Everton Weekes), ક્લાઇડ વોલ્કોટ (Clyde Walcott) અને કેન બેરિંગ્ટન (Ken Barrington)નો સમાવેશ થાય છે.
- ડગ્લસ જાર્ડિન - ઇંગ્લેન્ડ, 1932-1934
- એવરટન વીક્સ - વેસ્ટ ઇન્ડિઝ, 1948
- ક્લાઇડ વોલ્કોટ - વેસ્ટ ઇન્ડિઝ, 1948
- કેન બેરિંગ્ટન - ઇંગ્લેન્ડ, 1959
- સોનલ દિનુષા - શ્રીલંકા, 2026
ખાસ વાત એ છે કે જાર્ડિન અને એવરટન વીક્સે ભારત સામે પોતાની પ્રથમ 5 ટેસ્ટ ઇનિંગ્સમાં પણ 50+ સ્કોર નોંધાવ્યો હતો. વીક્સે તો સતત 4 સદી (Centuries) ફટકારી હતી અને ત્યારબાદ પાંચમી ઇનિંગ્સમાં 90 રન બનાવ્યા હતા.
2 મેચોની ટેસ્ટ સિરીઝની ચારેય ઇનિંગ્સમાં 50+ રન
સોનલ દિનુષા શ્રીલંકાનો ત્રીજો એવો બેટર પણ બન્યો છે, જેણે 2 મેચોની ટેસ્ટ સિરીઝની ચારેય ઇનિંગ્સમાં 50 કે તેથી વધુ રન બનાવ્યા છે. આ પહેલાં કુમાર સંગાકારા (Kumar Sangakkara)એ 2013માં બાંગ્લાદેશ સામે અને 2014માં ઇંગ્લેન્ડ સામે આ સિદ્ધિ મેળવી હતી. દિમુથ કરુણારત્ને (Dimuth Karunaratne)એ 2018માં દક્ષિણ આફ્રિકા સામેની ઘરઆંગણે રમાયેલી ટેસ્ટ સિરીઝમાં ચારેય ઇનિંગ્સમાં 50+ સ્કોર કર્યો હતો.
આ યાદી હવે આ પ્રમાણે છે:
- કુમાર સંગાકારા vs બાંગ્લાદેશ - ઘરઆંગણે, 2013
- કુમાર સંગાકારા vs ઇંગ્લેન્ડ - વિદેશમાં, 2014
- દિમુથ કરુણારત્ને vs દક્ષિણ આફ્રિકા - ઘરઆંગણે, 2018
- સોનલ દિનુષા vs ભારત - ઘરઆંગણે, 2026
ભારત સામે આ સિદ્ધિ મેળવનાર માત્ર બીજો બેટર
સોનલ દિનુષાની સિદ્ધિનું સૌથી મોટું મહત્વ એ છે કે ભારત સામે 2 મેચોની ટેસ્ટ સિરીઝની ચારેય ઇનિંગ્સમાં 50+ સ્કોર કરનાર તે વિશ્વનો માત્ર બીજો બેટર બન્યો છે. તેના પહેલાં ઝિમ્બાબ્વેના દિગ્ગજ એન્ડી ફ્લાવર (Andy Flower)એ વર્ષ 2000માં ભારત પ્રવાસ દરમિયાન આ કારનામો કર્યો હતો. ફ્લાવરે તે સિરીઝની 4 ઇનિંગ્સમાં અનુક્રમે 183, 70, 55 અને અણનમ 232 રન બનાવ્યા હતા. આ રીતે સોનલ દિનુષાએ ભારત જેવી મજબૂત ટીમ સામે સતત 4 ઇનિંગ્સમાં 50+ રન બનાવીને પોતાનું નામ ક્રિકેટના ખાસ રેકોર્ડ બુક (Record Book)માં નોંધાવી દીધું છે. તેની સતત બેટિંગ અને 2 સદી સહિતના શાનદાર પ્રદર્શનથી શ્રીલંકાને પણ આ ટેસ્ટ સિરીઝમાં મોટો ફાયદો થયો છે.
: Sonal Dinusha Century : કોણ છે સોનલ દિનુષા? જેણે પહેલી જ 2 ટેસ્ટમાં ટીમ ઈન્ડિયાના બોલર્સની ઉંઘ હરામ કરી દીધી!