પ્રાપ્ત વિગતો અનુસાર, મૂળ નડિયાદના હિતેશભાઈ સુથાર, તેમના પત્ની હિનાબેન સુથાર અને તેમની દીકરી ઈશાની સુથાર અમેરિકાના વુસ્ટરમાં આવેલી કોના લોજ નામની મોટેલમાં રહેતા હતા અને ત્યાં જ કામ કરતા હતા. દરમિયાન આ લોજમાં અચાનક કોઈ કારણોસર ભીષણ આગ ફાટી નીકળી હતી. આગ એટલી ઝડપથી ફેલાઈ ગઈ કે પરિવારને બહાર નીકળવાની તક જ ન મળી અને ત્રણેય લોકો આ અગ્નિકાંડનો ભોગ બન્યા હતા.

રોજીરોટી કમાવવા અને ઉજ્જવળ ભવિષ્યની આશા સાથે અમેરિકા ગયેલા આ પરિવારના એક સાથે ત્રણ સભ્યોના મોતના સમાચાર નડિયાદ પહોંચતા જ વતનમાં રહેતા પરિવારજનો અને સગા-સંબંધીઓમાં ભારે આઘાત અને શોકની લહેર છવાઈ ગઈ છે. અમેરિકામાં વસતા ગુજરાતી સમાજમાં પણ આ ઘટનાને પગલે શોકનો માહોલ છે.