મુલાકાત દરમિયાન સાંસદે સંબંધિત વિભાગોના અધિકારીઓ સાથે બેઠક કરીને રાહત અને પુનઃસ્થાપન કામગીરીની વિગતવાર સમીક્ષા કરી હતી. અસરગ્રસ્ત પરિવારોને સમયસર સરકારી સહાય પહોંચે, પીવાના પાણી, વીજળી, આરોગ્ય સહિતની આવશ્યક સેવાઓ ઝડપથી પુનઃસ્થાપિત કરવામાં આવે તેમજ નુકસાનનું યોગ્ય સર્વેક્ષણ કરીને સહાયની પ્રક્રિયા વિલંબ વિના પૂર્ણ કરવામાં આવે તે માટે તેમણે અધિકારીઓને જરૂરી સૂચનાઓ આપી હતી.

સાંસદ ભરત સુતરીયાએ જણાવ્યું હતું કે રાજ્ય સરકાર અને જિલ્લા તંત્ર દ્વારા વરસાદથી અસરગ્રસ્ત લોકોને તમામ શક્ય મદદ પૂરી પાડવા માટે કામગીરી કરવામાં આવી રહી છે. કોઈપણ પરિવાર સહાયથી વંચિત ન રહે અને દરેક અસરગ્રસ્ત વ્યક્તિ સુધી સરકારની યોજનાઓનો લાભ પહોંચે તે માટે તંત્ર સતત કાર્યરત રહે તેવી તેમણે સૂચના આપી હતી.

સ્થાનિક ગ્રામજનોએ પણ પોતાની સમસ્યાઓ રજૂ કરી હતી, જેમાં ખેતીને થયેલું નુકસાન, કાચા-પાકા મકાનોને થયેલી અસર, આંતરિક રસ્તાઓની ખરાબ સ્થિતિ અને અન્ય પ્રાથમિક સુવિધાઓ અંગે રજૂઆતો કરવામાં આવી હતી. સાંસદે તમામ રજૂઆતો ગંભીરતાથી સાંભળી સંબંધિત વિભાગોને તાત્કાલિક કાર્યવાહી કરવા જણાવ્યું હતું.

મુલાકાત દરમિયાન સ્થાનિક આગેવાનો, વિવિધ વિભાગોના અધિકારીઓ અને ગ્રામજનો મોટી સંખ્યામાં હાજર રહ્યા હતા. ભારે વરસાદ બાદ સામાન્ય જનજીવન ઝડપથી પૂર્વવત્ બને અને અસરગ્રસ્ત પરિવારોને વહેલી તકે રાહત મળે તે માટે તંત્ર દ્વારા યુદ્ધના ધોરણે કામગીરી હાથ ધરવામાં આવી રહી હોવાનું સાંસદે જણાવ્યું હતું. તેમણે લોકોને જરૂરી સાવચેતી રાખવા અને વહીવટી તંત્ર દ્વારા આપવામાં આવતી સૂચનાઓનું પાલન કરવા પણ અપીલ કરી હતી.

---------------

હિન્દુસ્થાન સમાચાર / Gondaliya Abhishek Nandrambhai