ભાવનગર, 27 ઓગસ્ટ (હિ.સ.)ભાવનગર શહેરને વધુ હરિયાળું, સ્વચ્છ અને પર્યાવરણમૈત્રી બનાવવાના હેતુથી પ્રધાનમંત્રી આવાસ યોજના-શહેરી ૨.૦ અંતર્ગત ભાવનગર મહાનગરપાલિકાના પી.એમ.એ.વાય. ઘટક દ્વારા મહત્વપૂર્ણ પર્યાવરણલક્ષી પહેલ હાથ ધરવામાં આવી છે. આ પહેલ અંતર્ગત શહેરના વિવિધ વિસ્તારોમાં નાગરિકોને વૃક્ષોના રોપાનું વિનામૂલ્યે વિતરણ કરવામાં આવ્યું હતું.
વૃક્ષારોપણ અને હરિયાળી વધારવાના આ અભિયાનનો મુખ્ય હેતુ શહેરમાં વધુમાં વધુ વૃક્ષોનું વાવેતર થાય અને નાગરિકોમાં પર્યાવરણ સંરક્ષણ અંગે જાગૃતિ વધે તે છે. વધતા શહેરીકરણ વચ્ચે વૃક્ષોનું મહત્વ વધુ વધી રહ્યું છે. વૃક્ષો હવામાંથી કાર્બન ડાયોક્સાઇડનું શોષણ કરી ઓક્સિજન પૂરો પાડે છે, ગરમી ઘટાડવામાં મદદરૂપ બને છે તેમજ શહેરના પર્યાવરણને સંતુલિત રાખવામાં મહત્વની ભૂમિકા ભજવે છે.
મહાનગરપાલિકા દ્વારા વિનામૂલ્યે રોપા ઉપલબ્ધ કરાવવાથી શહેરના વિવિધ વિસ્તારોમાં રહેતા નાગરિકોને પોતાના ઘર, સોસાયટી તેમજ આસપાસના જાહેર સ્થળોએ વૃક્ષો વાવવા માટે પ્રોત્સાહન મળશે. માત્ર રોપા વાવવાથી જ નહીં પરંતુ તેનું નિયમિત જતન અને સંવર્ધન કરવાથી આ અભિયાનને લાંબા ગાળે સફળતા મળી શકે છે.
ભાવનગરને હરિયાળું અને સુંદર શહેર બનાવવા માટે નાગરિકોની સક્રિય ભાગીદારી જરૂરી છે. "વૃક્ષ વાવો, વૃક્ષ ઉછેરો અને ભાવનગર હરિયાળું બનાવો"ના સંદેશ સાથે પર્યાવરણ સંરક્ષણની દિશામાં આ પહેલને આવકારવામાં આવી રહી છે.
---------------
હિન્દુસ્થાન સમાચાર / DISHANT NANDRAMBHAI GONADLIYA