CM Vijay Thalapathy: તમિલનાડુના મુખ્યમંત્રી સી. જોસેફ વિજય થલપતિએ ચેન્નઈની પુઝલ સેન્ટ્રલ જેલની મુલાકાત લઈને કેદીઓ માટે શિક્ષણ, પુનર્વસન અને વ્યાવસાયિક તાલીમની તકો વધારવા અધિકારીઓને નિર્દેશ આપ્યા છે. મુખ્યમંત્રીએ જેલમાં રહેલા કેદીઓ સાથે સીધી વાતચીત કરી તેમની સમસ્યાઓ અને ઉપલબ્ધ સુવિધાઓ અંગે જાણકારી મેળવી હતી.
કેદીઓને સુધારાની તક મળવી જોઈએ
જેલ અધિકારીઓના જણાવ્યા મુજબ મુખ્યમંત્રી વિજયે કેદીઓ પ્રત્યે સંવેદનશીલ વલણ અપનાવવાની જરૂરિયાત પર ભાર મૂક્યો હતો. તેમણે કહ્યું કે કેદીઓને પોતાની ભૂલો સુધારીને ફરી સમાજના મુખ્ય પ્રવાહમાં જોડાવાની તક મળવી જોઈએ. અજાણતાં થયેલી ભૂલ અને જાણીજોઈને કરવામાં આવેલા ગુનામાં તફાવત હોય છે, તેથી દરેક કેદીને તેની પરિસ્થિતિ અને વર્તનને ધ્યાનમાં રાખીને સુધારાની તક આપવી જોઈએ તેવી વાત તેમણે કરી હતી.
રસ પ્રમાણે શિક્ષણ અને વોકેશનલ ટ્રેનિંગ
મુખ્યમંત્રીએ અધિકારીઓને કેદીઓની રસ-રુચિ અને ક્ષમતાના આધારે શિક્ષણ તથા વ્યાવસાયિક તાલીમ ઉપલબ્ધ કરાવવા જણાવ્યું હતું. આ પ્રકારની તાલીમ તેમને જેલમાંથી બહાર આવ્યા બાદ રોજગાર મેળવવામાં અને સામાન્ય જીવનમાં ફરીથી જોડાવામાં મદદરૂપ બની શકે છે. વિજયે જેલોમાં વાંચનની સુવિધા વધારવા પર પણ ભાર મૂક્યો હતો. તેમણે કેદીઓને પૂરતી સંખ્યામાં પુસ્તકો મળે અને વાંચન માટે યોગ્ય વ્યવસ્થા ઉપલબ્ધ હોય તે સુનિશ્ચિત કરવા અધિકારીઓને કહ્યું હતું.
પુઝલ જેલના ત્રણ વિભાગની તપાસ
મુખ્યમંત્રી વિજયે વરિષ્ઠ જેલ અધિકારીઓ સાથે પુઝલ સેન્ટ્રલ જેલના અલગ-અલગ વિભાગોની મુલાકાત લીધી હતી. તેમાં અંડરટ્રાયલ કેદીઓ, સજા ભોગવી રહેલા કેદીઓ અને મહિલા કેદીઓ માટેના વિભાગનો સમાવેશ થાય છે. આ દરમિયાન તેમણે કેદીઓને જેલમાં આપવામાં આવતી સુવિધાઓ અંગે પણ પૂછપરછ કરી હતી. મુખ્યમંત્રીએ જેલના રસોડાની મુલાકાત લઈને ત્યાં તૈયાર થતા ભોજનની વ્યવસ્થા નિહાળી હતી. આ ઉપરાંત કપડાંના સ્ટોરેજ વિભાગ અને જેલમાં ઉપલબ્ધ તબીબી સુવિધાઓની પણ તપાસ કરી હતી.
તમિલનાડુની 125 જેલોમાં 23,608 કેદી
જેલ વિભાગના આંકડા અનુસાર તમિલનાડુમાં કુલ 125 જેલો છે અને તેમાં 23,608 કેદીઓ રાખવામાં આવ્યા છે. તેમાં નવ સેન્ટ્રલ જેલનો પણ સમાવેશ થાય છે. આ કેદીઓમાંથી 2,076 કેદીઓ નિરક્ષર છે, જ્યારે 1,317 કેદીઓ ગ્રેજ્યુએટ અને 323 કેદીઓ પોસ્ટ ગ્રેજ્યુએટ છે.
અમારી WhatsApp ચેનલમાં જોડાવા આ લિંક પર ક્લીક કરો
https://whatsapp.com/channel/0029VauCUMx6LwHmdrOBwa2X
વિધાનસભામાં ચર્ચા બાદ CMની જેલ મુલાકાત
મુખ્યમંત્રી વિજયની પુઝલ જેલની આ મુલાકાત વિધાનસભામાં જેલ વિભાગની ગ્રાન્ટ સંબંધિત માગણીઓ પર ચર્ચા બાદ થઈ છે. રાજ્ય સરકારે જેલ કર્મચારીઓ માટે વધારાના બોડી કેમેરાને મંજૂરી આપી છે. આ ઉપરાંત જેલ કર્મચારીઓ માટે નવી સિલાઈ ભથ્થાની વ્યવસ્થા પણ કરવામાં આવી છે.
Nepal Flood: વધી રહ્યો છે મોતનો આંકડો, અત્યાર સુધી 626ના મોત, ભારતે ટીમ મોકલી