જેમ અમીર લોકો આર્થિક જોખમોથી બચવા માટે પોતાના શેર બજારના પોર્ટફોલિયોને વૈવિધ્યસભર બનાવે છે, તે જ રીતે હવે અમેરિકાના અતિ-અમીર લોકો પણ અનિશ્ચિત વિશ્વમાં પોતાના ભવિષ્યને સુરક્ષિત કરવા માટે એક કરતાં વધુ દેશોની સિટીઝનશિપ અને રેસિડન્સીની મંજૂરી મેળવીને રાખવાનું વલણ અપનાવી રહ્યા છે. ઈન્વેસ્ટમેન્ટ માઈગ્રેશન એક્સપર્ટ્સના જણાવ્યા મુજબ, બીજા કે ત્રીજા દેશનું નાગરિકત્વ મેળવવા માંગતા ગ્રાહકોની બાબતમાં હવે અમેરિકાએ ચીનને પાછળ છોડી દીધું છે અને તે વિશ્વનું સૌથી મોટું માર્કેટ બની ગયું છે.

એપેક્સ કેપિટલ પાર્ટનર્સ નામના એક કન્સલ્ટિંગ ગ્રૂપ દ્વારા ટૂંક સમયમાં પ્રકાશિત થનારા સ્ટડી મુજબ, વર્ષે 2 લાખ ડોલરથી વધુની કમાણી કરતા 10માંથી 6 કરતાં વધુ (61ટકા) અમેરિકનો આગામી પાંચ વર્ષમાં અન્ય દેશમાં સ્થળાંતર કરવાનું વિચારી રહ્યા છે. આ ટ્રેન્ડ માત્ર કોઈ એક ચોક્કસ રાજકીય વિચારધારા પૂરતો સીમિત નથી. રિપોર્ટ મુજબ, વિદેશી પાસપોર્ટની ઈચ્છા રાખનારાઓમાં ડાબેરી (Left) અને જમણેરી (Right) બંને વિચારધારા ધરાવતા અમેરિકનોનો રેશિયો 50-50 ટકા જેટલો સરખો છે. ડોનાલ્ડ ટ્રમ્પ પ્રેસિડન્ટ તરીકે ફરી ચૂંટાયા બાદ, વૈકલ્પિક નાગરિકત્વની પૂછપરછમાં વાર્ષિક 183%નો જંગી ઉછાળો નોંધાયો છે.

ઈન્વેસ્ટમેન્ટ માઇગ્રેશન ફર્મ 'લેટિટ્યુડ વર્લ્ડ'ના સીઇઓ એરિક મેજરે ફોર્બ્સને જણાવ્યું હતું કે, 10 કરોડ ડોલરથી વધુની રોકાણ કરી શકાય તેવી સંપત્તિ ધરાવતા અમેરિકી ગ્રાહકો માટે ન્યૂઝીલેન્ડ સૌથી લોકપ્રિય વિકલ્પ બની રહ્યું છે. તેમણે કહ્યું, 'ત્યાં અંગ્રેજી બોલાય છે અને તે દુનિયાના બીજા છેડે આવેલું છે. જો કદાચ ત્રીજું વિશ્વયુદ્ધ ફાટી નીકળે, તો રહેવા માટે તે એક ખૂબ જ સુરક્ષિત અને ઉત્તમ જગ્યા છે.' જોકે, ન્યૂઝીલેન્ડનું નાગરિકત્વ મેળવવું સસ્તું નથી, ત્યાં ગ્રીન કાર્ડ મેળવવા માટે પ્રારંભિક રોકાણ 50 લાખ ન્યૂઝીલેન્ડ ડોલર (આશરે 30 લાખ યુએસ ડોલર)થી શરૂ થાય છે.

અમીર અમેરિકનો યુરોપના દેશોનું નાગરિકત્વ મેળવવામાં પણ ભારે રસ દાખવી રહ્યા છે, કારણ કે યુરોપના કોઈ એક દેશનું નાગરિકત્વ મેળવવાથી 29 દેશો ધરાવતા આખા શેન્ગન વિસ્તારમાં મુક્તપણે અવરજવર કરવાની મંજૂરી મળે છે. જોકે, સ્થાનિક સ્તરે રિયલ એસ્ટેટના ભાવો વધવાને કારણે વિદેશીઓ વિરુદ્ધ વિરોધ થતાં સ્પેન અને ગ્રીસ જેવા દેશોએ પોતાના 'ગોલ્ડન વિઝા'ના નિયમો ખૂબ કડક કર્યા છે અથવા તો કેટલાક પ્રોગ્રામ બંધ કરી દીધા છે.

નિષ્ણાતોના મતે, વર્ષ 2019માં વિદેશી નાગરિકત્વ મેળવનારાઓમાં અમેરિકનોનો હિસ્સો માત્ર 4 ટકા હતો, જે આજે વધીને 74 ટકા જેટલો થઈ ગયો છે, જે દર્શાવે છે કે વિશ્વની આ મહાસત્તાના અમીર નાગરિકો હવે પોતાના દેશના ભવિષ્યને લઈને ચિંતિત છે.