મૃતકને 12 વર્ષનો દીકરો છે જે યુએસ સિટીઝન છે, તેના પરિવારજનોનો દાવો છે કે તેને હાઈ બ્લડપ્રેશર તેમજ ડાયાબિટિસ ઉપરાંત બીજા પણ કેટલાક હેલ્થ ઈશ્યૂઝ હતા. જોકે, તેમ છતાંય તેના પર કોઈ ધ્યાન આપવામાં નહોતું આવ્યું. ICEની જેલોમાં ઈલીગલ ઈમિગ્રન્ટ્સને બદતર હાલતમાં રાખવામાં આવી રહ્યા છે તેવા આક્ષેપો વચ્ચે વધુ એક ઈલીગલ એલિયનનું મોત થતાં આ મામલો અમેરિકન મીડિયામાં ખાસ્સો ચર્ચાસ્પદ બન્યો છે.

મૃતક એડવિનના પરિવારજનોનું કહેવું છે કે તે અનેક પ્રકારની દવાઓ લેતો હતો, તેનું મોત થયું તે પહેલા તેના પરિવારજનોએ તેની સાથે વાત કરી હતી. જેમાં તેમને એવું જાણવા મળ્યું હતું કે નેવાર્કમાં આવેલા ઈમિગ્રેશન ડિટેન્શન સેન્ટરનો સ્ટાફ તેને ના તો દવાઓ પૂરી પાડતો હતો કે ના તો તેની કન્ડિશન પર કોઈ ધ્યાન અપાયું હતું. એડવિનના ફેમિલી મેમ્બર્સે મંગળવારે એક પ્રેસ કોન્ફરન્સ કરતાં જણાવ્યું હતું કે ડિટેન્શન સેન્ટરમાં તેને ખૂબ જ ખરાબ સ્થિતિમાં રખાયો હતો. તેની દીકરી મીડિયા સાથે વાત કરતાં રડી પડી હતી, તેણે એવું પણ કહ્યું હતું કે હવે મને પિતાનો પ્રેમ ક્યારેય નહીં મળી શકે. નેવાર્કમાં આવેલા ડેલની હોલ નામના આ ડિટેન્શન સેન્ટરને જિયો ગ્રુપ નામની પ્રાઈવેટ કંપની ઓપરેટ કરે છે. જોકે, DHS અને જિયો ગ્રુપનો દાવો છે કે એડવિનને જેલમાં તમામ પ્રકારની મેડિકલ કેર મળી હતી અને તેનું નિયમિત ચેક-અપ પણ થતું હતું.

એડવિનની જૂન 18ના રોજ ધરપકડ કરવામાં આવી હતી, ન્યૂજર્સીમાં રહેતો આ ઈમિગ્રન્ટ કામ પર જવા નીકળ્યો ત્યારે જ તેને ICE દ્વારા અરેસ્ટ કરી લેવાયો હતો. તેનું મોત થયાની માહિતી સોમવારના રોજ જાહેર કરવામાં આવી હતી. ICEએ એવું પણ જણાવ્યું હતું કે શનિવારે એડવિનની તબિયત લથડી તે વખતે જ જેલના સ્ટાફે સક્રિયતા દાખવતા ઈમરજન્સી મેડિકલ સર્વિસિસ માટે 911 પર ફોન કરી દીધો હતો. તેને નેવાર્ક સ્થિત યુનિવર્સિટી હોસ્પિટલમાં પણ લઈ જવાયો હતો પરંતુ ત્યાં સુધીમાં તેનું મોત થઈ ગયું હતું.

જોકે, આ ઘટના બની તેના એક દિવસ પહેલા જ મૃતકની માતાએ તેની સાથે ફોન પર વાત કરી હતી, તેણે તે વખતે જ પોતાની તબિયત સારી ના હોવાનું કહેતા એવું જણાવ્યું હતું કે તેનો ચહેરો અને જમણો હાથ સુન્ન પડી ગયા છે. તેણે પોતાના કેટલાક ટેસ્ટ્સ થવાના હોવાની પણ વાત કરી હતી પરંતુ બીજા દિવસે એડવિનની માતાને ડિટેન્શન સેન્ટરવાળાએ ફોન કરી તેનું મોત થઈ ગયું હોવાની જાણ કરી હતી. એડવિનની માતાએ એવો પણ દાવો કર્યો છે કે તેને હોસ્પિટલ લઈ જવાયો ત્યાં સુધીમાં તેનું મોત થઈ ચૂક્યું હતું.

એડવિન છેલ્લા વીસેક વર્ષથી અમેરિકામાં રહેતો હતો, તેના ભાઈનો દાવો છે કે તેની પાસે વેલિડ વર્ક પરમિટ પણ હતી. જોકે, ICEનું એવું કહેવું છે કે તેને ઓક્ટોબર 2016માં ડિપોર્ટ કરી દેવાયો હતો પરંતુ ત્યારબાદ તે ફરી અમેરિકામાં ઈલીગલી દાખલ થયો હતો અને યુએસમાં રહેવાનો તેને કોઈ લીગલ રાઈટ નહોતો. ગયા મહિને તેની ધરપકડ થઈ ત્યારબાદ તેને નેવાર્કમાં આવેલા ડિટેન્શન સેન્ટરમાં મોકલી દેવામાં આવ્યો હતો અને તેની સામે ડિપોર્ટેશનની કાર્યવાહી પણ શરૂ કરાઈ હતી. 2025માં ICEના ડિટેન્શન સેન્ટરમાં બંધ 33 ઈમિગ્રન્ટ્સના મોત થયા હતા જે 20 વર્ષનો રેકોર્ડ છે.