તાજેતરમાં જ હાથ ધરવામાં આવેલા એક સરવે અનુસાર ઈન્ડિયન અમેરિકન વોટર્સ હવે રિપબ્લિકન્સને બદલે ડેમોક્રેટ્સને વોટ આપવાનું નક્કી કરીને બેઠાં છે. AAPI ડેજા દ્વારા કરવામા આવેલા આ સરવે અનુસાર 66 ટકા ઈન્ડિયન અમેરિકન્સ ડેમોક્રેટિક પાર્ટીને વોટ આપવા માગે છે જ્યારે હજુય રિપબ્લિકન્સને સપોર્ટ કરી રહેલા અમેરિકન દેસીઓનું પ્રમાણ 22 ટકા જેટલું થાય છે, જ્યારે બાકીના કોને વોટ આપવો તે અંગે ખૂલીને કશુંય બોલવા તૈયાર નથી. આ સરવેમાં એવું પણ જણાવાયું કે ભારતીય મૂળના વોટર્સે અગાઉ ક્યારેય પણ ડેમોક્રેટિક પાર્ટીને આટલી હદે સપોર્ટ નથી કર્યો.

2024ની ચૂંટણી થવાની બાકી હતી ત્યારે ઈન્ડિયન-અમેરિકન વોટર્સનો મૂડ પારખવા માટે કરાયેલા એક સરવેમાં જાણવા મળ્યું હતું કે 32 ટકા લોકો ડેમોક્રેટિક પાર્ટીને સપોર્ટ કરી રહ્યા હતા જ્યારે ટ્રમ્પને સપોર્ટ કરનારા ભારતીય મૂળના વોટર્સનું પ્રમાણ 40 ટકા જેટલું ઉંચું નોંધાયું હતું. ટ્રમ્પને સપોર્ટ કરવાનું મુખ્ય કારણ વધતી મોંઘવારી હતું, આ સિવાય હેલ્થકેર, ક્રાઈમ અને રેસીઝમના મુદ્દે પણ ઈન્ડિયન્સે ટ્રમ્પને વોટ આપ્યા હતા.

જોકે, હવે ટ્રમ્પને સપોર્ટ ના કરતા હોય કે પછી તેમની નીતિઓથી નારાજ હોય તેવા ઈન્ડિયન-અમેરિકન્સનું પ્રમાણ વધીને 70 ટકાના સ્તરે પહોંચી ગયું છે. ટ્રમ્પની સેકન્ડ ટર્મને એક વર્ષ પૂરું થયું ત્યારે તેઓ એશિયન્સમાં કેટલા પોપ્યૂલર છે તે જાણવા માટે એક સરવે થયો હતો જેમાં 71 ટકા લોકોએ તેમના પરફોમન્સને ધાર્યા કરતાં નબળું ગણાવ્યું હતું. આ સરવેમાં ભાગ લેનારા મોટાભાગના લોકો ટેરિફ સહિતની ટ્રમ્પની આર્થિક નીતિઓથી નારાજ હતા, તેમનું માનવું હતું કે તેના લીધે અમેરિકામાં મોંઘવારી ઘટવાને બદલે ઘણી વધી ગઈ છે.

2024માં ટ્રમ્પને વોટ આપનારા મોટાભાગના ઈન્ડિયન્સ બાઈડને અપનાવેલી આર્થિક નીતિઓ તેમજ ઓપન બોર્ડર પોલિસીથી નારાજ હતા. તે વખતે ટ્રમ્પે મોંઘવારી અને ઈલીગલ ઈમિગ્રેશનને મોટા મુદ્દા બનાવ્યા હતા અને તેમનો પ્રચાર આ મુદ્દા પર જ કેન્દ્રિત રહ્યો હતો. અમેરિકામાં પોતાના બિઝનેસ ધરાવતા ગુજરાતીઓને એવી આશા હતી કે ટ્રમ્પ પોતે એક બિઝનેસમેન હોવાથી જો તેઓ પ્રેસિડેન્ટ બનશે તો નાના બિઝનેસ ધરાવતા લોકોને મોટો ફાયદો કરાવશે. જોકે, તેમની આ આશા ઠગારી નીવડી છે. ટ્રમ્પે ટેક્સમાં ભલે ઠીકઠાક રાહત આપી હોય પરંતુ તેની સામે તેમણે માસ ડિપોર્ટેશનના નામે જે અંધાધૂંધી ફેલાવી છે તેને કારણે બિઝનેસ ઓનર્સ માટે વર્કર્સ શોધવું મુશ્કેલ બની ગયું છે. તેવી જ રીતે ઈરાન વૉરથી લઈને ટેરિફ સહિતની બાબતોને કારણે અમેરિકામાં મોંઘવારીમાં જે વધારો થયો છે તેના કારણે પણ ટ્રમ્પ અળખામણાં બની રહ્યા છે.

ઈન્ડિયન અમેરિકન વોટર્સમાં ટ્રમ્પ સામે નારાજગી વધી રહી છે તેવી જ રીતે અમેરિકામાં તેમનું ઓવરઓલ અપ્રુવલ રેટિંગ પણ સતત ઘટી રહ્યું છે. મિડટર્મ ઈલેક્શન પહેલા જ ઘટતું જતું અપ્રુવલ રેટિંગ અને વધતી જતી મોંઘવારીને કારણે રિપબ્લિકન પાર્ટીના ઉમેદવારોને ચૂંટણી પ્રચાર કરવો ભારે પડી રહ્યો છે, પરંતુ ટ્રમ્પ જાણે પોતાને આવી કોઈ ચિંતા જ ના હોય તે રીતે પોતાની સ્ટાઈલમાં સરકાર ચલાવી રહ્યા છે. મહત્વની વાત એ છે કે ટ્રમ્પે પ્રેસિડેન્ટ બનતા પહેલા ઈલીગલ ઈમિગ્રેશન સામે કડક કાર્યવાહી કરવાની વાતો કરી હતી પરંતુ સત્તા પર આવ્યા બાદ તેઓ ઈલીગલની સાથે લીગલ ઈમિગ્રન્ટ્સને પણ એક જ ડંડાથી હાંકી રહ્યા હોય તેવો ઘાટ સર્જાયો છે. જેના કારણે લીગલી અમેરિકા જવાની રાહ જોઈ રહેલા કે પછી અમેરિકામાં જ રહેતા લોકો મૂંઝવણ ભરી સ્થિતિમાં મૂકાયા છે.

ફ્લોરિડામાં રહેતા એક ગુજરાતીએ આ અંગે અમારી સાથે વાત કરતા જણાવ્યું કે તેમના એક પરિચિતને 2025ની શરૂઆતમાં સિટીઝનશિપના ઓથ લેવા માટે જવાનું હતું, પરંતુ અનિવાર્ય સંજોગોને કારણે તેઓ ઓથ સેરેમનીમાં સમયસર ના પહોંચી શક્યા જેના કારણે તેમની સિટીઝનશિપ અટવાઈ ગઈ અને આજ દિન સુધી તેઓ તેના માટે રાહ જોતા બેઠા છે. તેવી જ રીતે શિકાગોમાં રહેતા એક ગુજરાતી મહિલા પોતે સિટીઝન બની જાય તો ઈન્ડિયામાં એકલાં રહેતાં માતાને અમેરિકા બોલાવી શકાય તેની રાહ જોઈ રહ્યા છે પરંતુ છેલ્લા દોઢ વર્ષથી તેમની સિટીઝનશિપની પિટિશન અટવાયેલી પડી છે.

એટલાન્ટામાં પોતાનો બિઝનેસ ધરાવતા એક ગુજરાતીનું માનીએ તો ટ્રમ્પની ઈમિગ્રેશન પોલિસીને કારણે વર્કર્સની શોર્ટેજ એટલી બધી તીવ્ર બની ગઈ છે કે બિઝનેસ ચલાવવા ભારે પડી ગયા છે. આ ઉપરાંત ગેમ્બલિંગ મશીન ચલાવવા સહિતના ઈલીગલ બિઝનેસ સાથે સંકળાયેલા ઘણા દેસીઓને પણ ટ્રમ્પના ડરના કારણે પોતાના ધંધા બંધ કરવા પડ્યા છે. અલગ-અલગ કારણોસર ટ્રમ્પથી નારાજ ગુજરાતીઓનું કહેવું છે કે અમેરિકન્સમાં પણ ટ્રમ્પ સામે રોષ જોવા મળી રહ્યો છે જેની અસર નવેમ્બરમાં થનારી ચૂંટણી પર પડ્યા વિના નથી રહેવાની. આપને શું લાગે છે, ટ્રમ્પને ખરેખર મિડટર્મ્સમાં મોટું નુક્સાન વેઠવું પડશે કે પછી તેઓ આક્રામક માસ ડિપોર્ટેશનના આધારે બધું મેનેજ કરી લેશે? આપનો મત કમેન્ટમાં ચોક્કસ જણાવજો.