વોલમાર્ટે ભાવઘટાડાની જાહેરાત કરતા જ ડોનલ્ડ ટ્રમ્પે તેનો જશ ખાટવાનો પ્રયાસ કરતા ટ્રુથ સોશિયલ પર લખ્યું હતું કે અમેરિકાની સૌથી મોટી રિટેલ કંપની પોતાની સરકારના કહેવા પર દેશના 250મા સ્વતંત્રતા દિને ભાવોમાં ઘટાડો કરવાનું નક્કી કર્યું છે. જોકે, ટ્રમ્પ પહેલા વોલમાર્ટે જ આ અંગેની પ્રેસ રિલિઝ ઈશ્યૂ કરી હતી જેમાં ટ્રમ્પ કે પછી તેમની સરકારની વિનંતીનો કોઈ પ્રકારનો ઉલ્લેખ કરવામાં નહોતો આવ્યો. વોલમાર્ટ બાદ અમેરિકાના અન્ય રિટેલર્સ પણ આગામી દિવસોમાં આ ટ્રેન્ડને અનુસરે તેવી શક્યતા છે.

વોલમાર્ટના ચીફ મર્ચન્ટ જુલી બાર્બરે એક પ્રેસ રિલિઝમાં જણાવ્યું હતું કે કંપનીએ સમર સીઝનમાં પ્રાઈસમાં ઈન્વેસ્ટમેન્ટ કર્યું છે જેના ભાગરૂપે ખાવાપીવા સહિતની અનેક ચીજવસ્તુઓના ભાવમાં મહત્તમ 15 ટકા જેટલો ઘટાડો કરવામાં આવશે. અમેરિકામાં અમુક ગ્રોસરી સ્ટોર ચેઈન્સ ગ્રાહકોને આકર્ષવા માટે સિલેક્ટેડ આઈટમ્સના ભાવમાં ઘટાડો કરી રહી છે. જૂનમાં ક્રોગરે પોતાના ઈન્વેસ્ટર્સને જણાવ્યું હતું કે બિઝનેસ વધારવા માટે કંપની અમુક વસ્તુઓ પર પ્રાઈસ ટેસ્ટ કરી રહી છે.

ટ્રમ્પે લાગુ કરેલા ટેરિફને સુપ્રીમ કોર્ટે રદ કર્યા ત્યારબાદ વોલમાર્ટે પણ રિફંડ માટે એપ્લાય કર્યું હતું, જોકે તેનો આંકડો હજુ સુધી કંપનીએ જાહેર નથી કર્યો પરંતુ એવું કહેવાય છે કે વોલમાર્ટને મળનારી રિફંડની રકમ 2.4 બિલિયનથી 10.2 બિલિયન ડોલર જેટલી હોઈ શકે છે. સુપ્રીમ કોર્ટના ઓર્ડર બાદ અમેરિકાની સરકારે 166 બિલિયન ડોલરનું રિફંડ કરવાનું થતું હતું.

આમ તો દોઢ મહિના પહેલા જ વોલમાર્ટે ટેરિફ રિફંડની પ્રોસેસ પૂરી થયા બાદ પ્રાઈસમાં કાપ મૂકવાની જાહેરાત કરી હતી, પરંતુ ઈરાન વૉરને કારણે ફ્યુઅલની કિંમત વધી જવાથી ટ્રાન્સપોર્ટેશનમાં થયેલા વધારાને લીધે આ ઘટાડો લાગુ નહોતો થઈ શક્યો. તાજેતરમાં જ કંપનીએ એવી પણ શક્યતા વ્યક્ત કરી હતી કે ફ્લુઅલની પ્રાઈસમાં થયેલા અણધાર્યા વધારાને કારણે 2026માં તેનો બિઝનેસ પ્રભાવિત થઈ શકે છે.

આ જાહેરાત બાદ વોલમાર્ટના શેર્સમાં ભારે કડાકો નોંધાયો હતો અને અમેરિકાના અન્ય રિટેલર્સે પણ લોકોની ખરીદશક્તિ ઘટવાની શક્યતા હોવાની વાત કરતા સરકાર પ્રેશરમાં આવી ગઈ હતી. 2025 શરૂ થયું ત્યારે અમેરિકામાં મોંઘવારી વધવાનો વાર્ષિક દર ત્રણ ટકાની આસપાસ હતો જે છેલ્લા બાર મહિનામાં ચાર ટકા પર પહોંચી ગયો છે તેવું ખુદ અમેરિકાની સરકારના આંકડા કહે છે. જોકે, ઈરાન સાથે ડીલ થયા બાદ ક્રુડની કિંમત નીચે આવતા મિડટર્મ પહેલા ફુગાવામાં ઘટાડો થાય તેવી પૂરી શક્યતા છે.

હવે જ્યારે વોલમાર્ટે ફાઈનલી ભાવઘટાડાની જાહેરાત કરી દીધી છે ત્યારે ટ્રમ્પ તેની ક્રેડિટ લેવા મથી રહ્યા છે કારણકે તેમની ટેરિફ પોલિસીને કારણે જ અમેરિકામાં ઈન્ફ્લેશન વધ્યું હતું અને ટેરિફનો બોજ લોકોના માથે આવ્યો હતો, ટેરિફ રદ થયા તેવામાં ટ્રમ્પે ઈરાન વૉર શરૂ કરતાં મોંઘવારીમાં મોટો ભડકો થયો હતો. જોકે, હવે સ્થિતિ સામાન્ય બની રહી છે અને મિડટર્મ ઈલેક્શન પણ નજીક આવી રહ્યા છે તેવામાં મોંઘવારીમાં થનારા સંભવિત ઘટાડાનો જશ જો પોતાને મળે તો મોટો પોલિટકલ ફાયદો થઈ શકે તેવી ટ્રમ્પની ગણતરી છે. કારણકે, અમેરિકામાં મોંઘવારી હાલ એટલો સળગતો મુદ્દો છે કે લોકોમાં સરકાર સામે સખ્ત નારાજગી જોવા મળી રહી છે, ટ્રમ્પનું ઘટતું અપ્રુવલ રેટિંગ પણ તેનો પુરાવો આપી રહ્યું છે અને ખાસ તો ગ્રોસરીના ભાવ વધતા અમેરિકામાં રહેતા ઈન્ડિયન્સ પણ પરેશાન છે.

સરકારી આંકડા અનુસાર ભલે ભાવો અમુક ટકા વધતા હોય પરંતુ ગ્રાઉન્ડ રિયાલિટી તેનાથી કંઈક અલગ જ હોવાનો લોકોનો દાવો છે. આમ તો ટ્રમ્પની પોલિસીને કારણે મોઘવારી વધી ત્યારે તેનો સૌથી વધુ લાભ વોલમાર્ટને જ મળ્યો હતો કારણકે કંપની પોતાની અદ્દભૂત સ્ટ્રેટેજી અને સપ્લાયર્સના નેટવર્ક દ્વારા ચીજવસ્તુઓના ભાવ પોતાના પ્રતિસ્પર્ધીઓની સરખામણીએ નીચા રાખી શકી હતી જેના કારણે તેના બિઝનેસમાં વધારો થયો હતો.

વોલમાર્ટ અત્યારસુધી મિડલ અથવા હાયર ઈનકમની કેટેગરીમાં આવતા હોય તેવા કસ્ટમર્સને ટાર્ગેટ કરતી હતી જ્યારે ટ્રમ્પના પ્રેસિડેન્ટ બન્યા બાદ તેણે ડોલર જનરલ જેવા સ્ટોર્સને પણ કોમ્પિટિશન આપવાનું શરૂ કરતાં ઓછી આવક ધરાવતા લોકો પણ વોલમાર્ટમાં ડીલ શોધવા માડ્યા હતા. વોલમાર્ટે ગ્રોસરી સહિતની જીવનજરૂરી ચીજવસ્તુઓના ભાવ અન્ય રિટેલર્સથી નીચા રાખતા તેના બિઝનેસમાં ખાસ્સો ઉછાળો આવ્યો હતો.

ટ્રમ્પ વોલમાર્ટને અમેરિકન કન્ઝ્યુમર્સનું બિહેવિયર ચેક કરવાના બેરોમીટર તરીકે જૂએ છે, મે 2025માં તેમણે વોલમાર્ટને ટેરિફનો બોજ ગ્રાહકોના માથે નાખવાને બદલે પોતાની રીતે એડજસ્ટ કરી લેવા માટે જણાવ્યું હતું પરંતુ કંપનીએ તેમની આ વાત પર 100 ટકા અમલ ના કરતા ઘણી વસ્તુઓના ભાવોમાં સારો એવો વધારો થયો હતો. તે જ વખતે એમેઝોને ટેરિફને કારણે કઈ વસ્તુની કિંમતમાં કેટલો વધારો થયો તેની માહિતી આપવાનું પણ શરૂ કર્યું હતું પરંતુ વ્હાઈટ હાઉસે પોતાનો પાવર બતાવી તેના પર રોક લગાવી દીધી હતી. હવે જ્યારે વોલમાર્ટ બાદ અન્ય રિટેલર્સ પણ ભાવોમાં ઘટાડો કરી શકે છે તેવામાં ટ્રમ્પ જેવા પાક્કા રાજકારણી તેમાં પણ પોતાનો ફાયદો શોધી રહ્યા છે.