મહાનગરપાલિકાની એનીમલ ન્યુસન્સ કંટ્રોલ શાખા દ્વારા શહેરના વિવિધ વિસ્તારોમાં તપાસ હાથ ધરી જાહેર સ્થળોએ ઘાસચારો વેચતા ઇસમોને કાયદાકીય જોગવાઈઓ તેમજ જિલ્લા મેજિસ્ટ્રેટના જાહેરનામાનું કડક પાલન કરવા અંગે સમજ અને ચેતવણી આપવામાં આવી હતી. આ ઝુંબેશ દરમિયાન એનીમલ ન્યુસન્સ કંટ્રોલ શાખાના અધિકારી ડી. એચ. સાટી તથા તેમની ટીમે પોલીસ વિભાગના સહયોગથી કમલાબાગથી નરસંગ ટેકરી સુધીનો માર્ગ તેમજ ચોપાટી ખાતે પેરેડાઇઝ ફુવારાથી ક્રિકેટ ગ્રાઉન્ડ સુધીના વિસ્તારોમાં આકસ્મિક તપાસ હાથ ધરી હતી. તપાસ દરમિયાન જાહેર સ્થળોએ ઘાસચારો વેચતા ઇસમોનો સીધો સંપર્ક કરી જાહેર માર્ગો પર ઘાસચારો વેચાણ ન કરવા અને જિલ્લા મેજિસ્ટ્રેટના જાહેરનામાનું કડક પાલન કરવા સૂચના આપવામાં આવી હતી. મહાનગરપાલિકા દ્વારા જણાવાયું હતું કે જાહેર માર્ગો પર ઘાસચારો વેચવાથી રખડતા ઢોર રસ્તા પર એકત્ર થતાં હોવાથી ટ્રાફિક અવરોધ, ગંદકી તેમજ અકસ્માત જેવી ગંભીર પરિસ્થિતિઓ સર્જાઈ શકે છે. મહાનગરપાલિકા દ્વારા અગાઉ પણ સંબંધિત ઇસમોને સ્થળ પર જઈ રૂબરૂ સમજાવટ કરવામાં આવી હતી અને નિયમો અંગે જાણ કરવામાં આવી હતી, તેમ છતાં સમજાવટ અને જાણકારી બાદ પણ બેદરકારી દાખવી નિયમોનું ઉલ્લંઘન કરનાર ઇસમો સામે વિશેષ ઝુંબેશ દરમિયાન કડક કાર્યવાહી કરવામાં આવી છે. કાર્યવાહી અંતર્ગત નિયમોનો ભંગ કરતા કુલ 7 ઇસમો સામે મહાનગરપાલિકાની એનીમલ ન્યુસન્સ કંટ્રોલ શાખા દ્વારા પોલીસ ફરિયાદ દાખલ કરવામાં આવી છે. મહાનગરપાલિકાએ સ્પષ્ટ કર્યું છે કે ભવિષ્યમાં પણ જાહેર સ્થળોએ ગેરકાયદેસર રીતે ઘાસચારો વેચાણ કરી જાહેર વ્યવસ્થા ખોરવનાર સામે નિયમ મુજબ કડક કાયદાકીય કાર્યવાહી કરવામાં આવશે. સાથે જ એનીમલ ન્યુસન્સ કંટ્રોલ શાખા દ્વારા જીવદયા અને ધાર્મિક ભાવના ધરાવતા નાગરિકોને અપીલ કરવામાં આવી છે કે ગાયોને ઘાસચારો ખવડાવવાની ઇચ્છા ધરાવતા પશુ પ્રેમી સેવાભાવીઓ જાહેર માર્ગો પર પશુઓને ચારો આપવાને બદલે સીધા માન્ય ગૌશાળાઓમાં ઘાસચારો અર્પણ કરે અથવા દાન આપે. આ રીતે ગૌસેવાની ભાવના પણ જળવાઈ રહેશે અને શહેરમાં ટ્રાફિક વ્યવસ્થા, સ્વચ્છતા તથા જાહેર સુરક્ષા પણ જળવાઈ રહેશે. પોરબંદર મહાનગરપાલિકાએ નાગરિકોને શહેરને સ્વચ્છ, સુરક્ષિત અને સુવ્યવસ્થિત બનાવવા માટે તંત્રને સહયોગ આપવા તેમજ જાહેર સ્થળોએ ગેરકાયદેસર ઘાસચારો વેચાણને પ્રોત્સાહન નહીં આપવા અનુરોધ કર્યો છે.

જિલ્લા કલેકટરના જાહેરનામાનો ભંગ કર્યાનો 3 મહિલા સહિત સાત સામે નોંધાયો ગુનો

પોરબંદરના જિલ્લા કલેકટર દ્વારા જાહેરમાં ઘાસચારો નાખવા ઉપર પ્રતિબંધ અંગેનું રખડતા ઢોર નિયંત્રણનું જાહેરનામું બહાર પાડવામાં આવ્યું છે. તે અંતર્ગત પોરબંદરના કડિયા પ્લોટ માં રહેતા સવદાસ માલદે બાપોદરા, ધરમપુર ના પાટીયા પાસે રહેતી ઈલા વિજય રાઠોડ, છાયા સોસાયટી પાસે આવેલી જનતા સોસાયટીમાં રહેતી ઉજાલા અરુણ સોલંકી, ફોરેસ્ટ ઓફિસ પાસે આવેલ રામ મંદિર પાસે રહેતો દિનેશ હીરાલાલ ડાલકિયા,મેયર સાગર મોદીના નિવાસ સ્થાન સામે દરોડો પાડીને વી.વી. બજારમાં રહેતી રિદ્ધિ તુલસી ચુડાસમા, પોરબંદરના ઝૂરી બાગમાં રહેતા નાથા ઓઘડ કોડીયાતર, અને ચૂનાના ભઠ્ઠા પાસે રહેતા સુમરા ફિરોજ ઈસ્માઈલ સામે ગુના દાખલ કરવામાં આવ્યા હતા.

તમામ ધંધાર્થીઓ પાસેથી ઘાસચારો જપ્ત થઈ શક્યો નહીં!!
પોરબંદર મહાનગરપાલિકાના પશુ ચિકિત્સક અને એ. એન.સી. ડી. શાખાના અધિકારી એવા ફરિયાદી ડી.એચ. સાટીએ જે પોલીસ ફરિયાદ નોંધાવી છે તેમાં આપવામાં આવેલી વિગતો આશ્ચર્યજનક છે! કારણ કે એક બાજુ એવું જણાવ્યું છે કે મહાનગરપાલિકાના અધિકારી તરીકે પોતે ઉપરાંત આસિસ્ટન્ટ સેનેટરી ઇન્સ્પેક્ટર અને પોલીસ કર્મચારીઓ બધા જ સાથે મળીને પેટ્રોલિંગમાં નીકળ્યા હતા. અને આમ છતાં તમામ ધંધાર્થીઓએ ઉશ્કેરાઈને મન ફાવે તેમ બોલાચાલી કરીને જાહેરમાં પડેલ ઘાસચારો ફરિયાદી જપ્ત કરવા ગયા ત્યારે ત્યાં રખડતા ઢોરોને જાહેરમાં વેર વીખેર કરી ખવડાવી દીધો હતો તેથી જપ્ત કરી શકવામાં આવ્યો નથી તેમ જ અન્ય સ્ટાફ સાથે પણ ઉદ્ધતાઈભર્યું વર્તન અને બોલાચાલી કર્યાનું જણાવ્યું છે ત્યારે સ્વાભાવિક રીતે જ પોલીસ સાથેનો મહાનગરપાલિકાનો કાફલો દોડી ગયો હોય ત્યારે તેમની સાથે આ પ્રકારે વર્તન થયું હોય તે આશ્ચર્યજનક છે!