આંતરરાષ્ટ્રીય સ્તરે થનારા આ ઘટાડાની સીધી અસર ભારતીય બજારમાં સોનાના ભાવ પર પણ પડી શકે છે.

વર્લ્ડ ગોલ્ડ કાઉન્સિલના જણાવ્યા અનુસાર, સોનું હાલ એક ચોક્કસ શ્રેણીમાં ટ્રેડ થઈ રહ્યું છે, પરંતુ ટેક્નિકલ સંકેતો કેટલાક મહત્ત્વપૂર્ણ સપોર્ટ ઝોન તરફ ઈશારો કરે છે. રિપોર્ટ અનુસાર, જો ભાવ પ્રતિ અૌંસ 3,943 યુએસ ડોલરથી નીચે જશે, તો બજારમાં મંદીનું વલણ વધુ મજબૂત બની શકે છે. આ સિવાય બીજું એક મુખ્ય સપોર્ટ ઝોન 3,857 થી 3,887 ડોલર પ્રતિ અૌંસ વચ્ચે છે, જેના પર ટ્રેડર્સ ઝીણવટપૂર્વક નજર રાખી રહ્યા છે.

WGC માને છે કે જો સોનું 3,857 થી 3,887 ડોલરના સપોર્ટ રેન્જને તોડીને નીચે જશે, તો ભાવમાં ઝડપી કડાકો આવી શકે છે. આ સ્થિતિમાં સોનાનો ભાવ તેના પછીના મુખ્ય સપોર્ટ લેવલ એટલે કે આશરે 3,500 યુએસ ડોલર પ્રતિ અૌંસ સુધી નીચે આવી શકે છે. રિપોર્ટના આધારે, જો ભાવ 3,500 ડોલર સુધી પહોંચે તો તે જાન્યુઆરી 2026માં સોનાએ બનાવેલી રેકોર્ડ સર્વોચ્ચ સપાટી કરતાં લગભગ 37 ટકા જેટલો ઘટાડો દર્શાવે છે. જોકે, આ માત્ર એક ટેક્નિકલ અંદાજ છે અને ભાવ ચોક્કસપણે ત્યાં પહોંચશે જ તેવો કોઈ નિશ્ચિત દાવો નથી.

આવા મોટા ઘટાડાની શક્યતાઓ વચ્ચે WGCનું કહેવું છે કે કેટલાક વૈશ્વિક પરિબળો સોનાના ભાવને સપોર્ટ પણ કરી શકે છે. જાપાની યેનમાં મજબૂતી અને યુએસ ડોલરમાં નબળાઈને કારણે સોનાની માંગ વધી શકે છે. આ સાથે ઈરાન સાથે સંકળાયેલી ભૂ-રાજકીય ઉત્તેજના જેવા બનાવો રોકાણકારોના માનસ અને સોનાના ભાવ પર અસર પાડી શકે છે.

આંતરરાષ્ટ્રીય બજારમાં સોનાના ભાવમાં થતી કોઈપણ મોટી હલચલની સીધી અસર સ્થાનિક બજાર પર પડે છે. જો વૈશ્વિક સ્તરે ભાવમાં મોટો ઘટાડો આવે છે, તો ભારતમાં પણ સોનાના દરમાં નરમ વલણ જોવા મળી શકે છે. જોકે, ભારતમાં આ ઘટાડો કેટલો રહેશે તેનો આધાર રૂપિયા-ડોલરનો એક્સચેન્જ રેટ, ઈમ્પોર્ટ ડ્યુટી અને સ્થાનિક માંગ જેવા પરિબળો પર રહેશે.

દરમિયાન, ભાવમાં કડાકાની ચિંતાઓ વચ્ચે પણ બુધવારે મલ્ટિ કોમોડિટી એક્સચેન્જ (MCX) પર સોના-ચાંદીના ભાવમાં ઉછાળો જોવા મળ્યો હતો. સોનું રૂ. 1,100 વધીને રૂ. 1,45,393 પ્રતિ 10 ગ્રામ પર ટ્રેડ થઈ રહ્યું હતું, જ્યારે ચાંદી રૂ. 2,400 વધીને રૂ. 2,24,065 પ્રતિ કિલોગ્રામ પર પહોંચી હતી. વિતેલા અઠવાડિયા દરમિયાન બંને કિંમતી ધાતુઓમાં નોંધપાત્ર ઘટાડો આવ્યા બાદ આ રિકવરી જોવા મળી છે.