આકાશમાંથી વરસતી અગનજ્વાળાઓ અને અસહ્ય ઉકળાટ વચ્ચે જ્યારે સક્ષમ લોકો પોતાના એર-કન્ડિશન્ડ ઘરોમાં આશરો લઈ રહ્યા છે, ત્યારે રસ્તાના કિનારે, બાંધકામની સાઇટો પર અને ઝૂંપડપટ્ટીઓમાં રહેતા અસંખ્ય માસૂમ બાળકો અને પરસેવાથી રેબઝેબ થતા શ્રમિકો આ કાળઝાળ ગરમીમાં માત્ર એક ક્ષણની ઠંડક માટે તરસી રહ્યા છે. આવા વંચિત અને જરૂરિયાતમંદ લોકોના જીવનમાં થોડી ખુશી, રાહત અને માનવતાની ટાઢક પહોંચાડવા માટે ઉદગમ ચેરિટેબલ ટ્રસ્ટ અને એસોસિયેશન ફોર સોશિયલ વેલ્ફેર એન્ડ ડેવલપમેન્ટ(આસ્વાદ) સંસ્થા દ્વારા એક સંવેદનશીલ સેવા પહેલ હાથ ધરવામાં આવી.

બંને સંસ્થાના સેવાભાવી સભ્યો અને સ્વયંસેવકોએ શહેરના વિવિધ સેવા વસ્તી વિસ્તારો અને શ્રમજીવી વસાહતોમાં જઈને સેંકડો બાળકો, રાહદારીઓ અને મજૂર પરિવારો વચ્ચે વિવિધ પ્રકારના ૧૦,૦૦૦ આઈસ્ક્રીમનું વિતરણ કર્યું.

ઉદગમના મેનેજિંગ ટ્રસ્ટી ડો. મયુર જોષીએ જણાવ્યું હતું કે, 'ભગવાન દરેક જગ્યાએ સ્વયં પહોંચી શકતા નથી, કદાચ એટલા માટે જ તેઓ આપણને કોઈના ચહેરા પર સ્મિત લાવવાનું માધ્યમ બનાવે છે.'

આસ્વાદના ચેરપર્સન પરમજીત કૌર છબડાએ જણાવ્યું હતું કે, 'આ માત્ર આઈસ્ક્રીમનું વિતરણ નહોતું, પરંતુ આ કાળઝાળ ગરમીમાં સુકાઈ ગયેલા હોઠો સુધી સ્નેહ, લાગણી અને ઠંડક પહોંચાડવાનો અમારો નમ્ર પ્રયાસ હતો.'

કાર્યક્રમ દરમિયાન જ્યારે એક નાનકડા બાળકના હાથમાં આઈસ્ક્રીમનો કપ આવ્યો ત્યારે તેની આંખોમાં દેખાયેલી ચમક અને ચહેરા પર ફેલાયેલું નિર્દોષ સ્મિત ત્યાં હાજર દરેક વ્યક્તિના દિલને સ્પર્શી ગયું. ધ્રૂજતા હાથે આઈસ્ક્રીમ સ્વીકારતી એક વૃદ્ધાના આશીર્વાદ સંસ્થા માટે કોઈ મોટા એવોર્ડ કરતાં ઓછા નહોતા. પરસેવો લૂછતાં-લૂછતાં આઈસ્ક્રીમનો આનંદ માણતા શ્રમિકોના ચહેરા જોઈને એવું અનુભવાયું કે માનવતા આજે પણ જીવંત છે.

ઉદગમ ચેરિટેબલ ટ્રસ્ટ અને આસ્વાદ સંસ્થા હંમેશા સમાજના છેવાડાના લોકોની પીડાને પોતાની સમજી તેમની સાથે ઉભા રહ્યા છે. આ સેવાયજ્ઞને સફળ બનાવવા માટે દીપાંશ છાબડા, ભૂમિ જોગાણી, વિક્રમ દેસાઈ, મણિભાઈ શ્રીમાળી, ગાંધીનગર મનપા કોર્પોરેટર ભાવનાબા ગોલ, પ્રેમલસિંહ ગોલ, સહિત અનેક સ્વયંસેવકોએ પોતાના કિંમતી સમયનું યોગદાન આપી કાળઝાળ બપોરમાં રસ્તા પર ઉતરી સેવા કાર્ય કર્યું.