West Bengal Election Re-polling 2026: પશ્ચિમ બંગાળમાં બીજા તબક્કાના મતદાન દરમિયાન સર્જાયેલી અરાજકતા અને હિંસાને પગલે ચૂંટણી પંચે આકરા પગલાં લીધા છે. પંચે રાજ્યના 15 જેટલા મતદાન કેન્દ્રો પર ફેર મતદાન (Re-polling) યોજવાની સત્તાવાર જાહેરાત કરી છે. આ માટેનું નોટિફિકેશન પણ બહાર પાડી દેવામાં આવ્યું છે.

West Bengal ના કયા વિસ્તારોમાં યોજાશે ફેર મતદાન?

દક્ષિણ 24 પરગણા જિલ્લાના સૌથી વધુ અસરગ્રસ્ત વિસ્તારોમાં આ પ્રક્રિયા હાથ ધરવામાં આવશે:

ડાયમંડ હાર્બર: અહીંના 4 મતદાન કેન્દ્રો પર ફરી મતદાન થશે.

મગરાહાટ પશ્ચિમ: અહીંના 11 મતદાન કેન્દ્રો પર ફરી મતદાન યોજાશે.

સમય: આ 15 કેન્દ્રો પર 2 મે, શનિવારના રોજ સવારે 7 વાગ્યાથી મતદાન પ્રક્રિયા શરૂ થશે.

હિંસા અને EVM સાથે છેડછાડના આક્ષેપ

ફાલ્ટામાં વિવાદ: ફાલ્ટા વિધાનસભા ક્ષેત્રમાં ભાજપે ગંભીર આક્ષેપ કર્યો છે કે ઈવીએમ પર તેમના ચૂંટણી ચિહ્ન પર ટેપ લગાવી દેવામાં આવી હતી. આ મામલે 30 થી વધુ બૂથો પર પણ ફેર મતદાનની શક્યતા સેવાઈ રહી છે.

કુલ ફરિયાદો: ભાજપ દ્વારા કુલ 77 બૂથો પર ફેર મતદાનની માંગ કરવામાં આવી છે, જેમાંથી 64 બૂથ માત્ર અભિષેક બેનર્જીના મતક્ષેત્ર ડાયમંડ હાર્બરના છે.