ભારે વરસાદ (Rain)થી જનજીવન પ્રભાવિત

વલસાડ જિલ્લામાં ભારે વરસાદને કારણે અનેક વિસ્તારોમાં પાણી ભરાઈ ગયા છે. કેટલાક માર્ગો પર પાણી ફરી વળતાં વાહનવ્યવહારને અસર પહોંચી છે, જ્યારે વિદ્યાર્થીઓની સુરક્ષાને ધ્યાનમાં રાખીને અનેક શાળાઓમાં રજા જાહેર કરવામાં આવી છે. નવસારી અને ડાંગ જિલ્લામાં પણ સતત વરસાદને કારણે તંત્ર દ્વારા પરિસ્થિતિ પર સતત નજર રાખવામાં આવી રહી છે. સંવેદનશીલ વિસ્તારોમાં રહેતા લોકોને સાવચેત રહેવા તેમજ જરૂરી હોય તો સલામત સ્થળે ખસેડવાની કામગીરી શરૂ કરવામાં આવી છે.

ભારે વરસાદને લઈ તંત્ર એલર્ટ

સાંસદ ધવલ પટેલે જણાવ્યું હતું કે, ભારે વરસાદની સ્થિતિને ધ્યાનમાં રાખીને જિલ્લા વહીવટી તંત્ર, પોલીસ, ફાયર બ્રિગેડ, આરોગ્ય વિભાગ અને આપત્તિ વ્યવસ્થાપન ટીમો 24 કલાક કાર્યરત છે. જ્યાં જરૂરિયાત ઊભી થઈ છે ત્યાં અસરગ્રસ્ત પરિવારોને સુરક્ષિત આશ્રયસ્થાનોમાં ખસેડવામાં આવી રહ્યા છે. આશ્રયસ્થાનોમાં રહેવાની વ્યવસ્થા ઉપરાંત શુદ્ધ પીવાનું પાણી, ફૂડ પેકેટ્સ, દવાઓ અને અન્ય આવશ્યક સુવિધાઓ પણ ઉપલબ્ધ કરાવવામાં આવી છે.

તેમણે વધુમાં જણાવ્યું કે, કોઈપણ ઇમરજન્સી પરિસ્થિતિમાં ઝડપી બચાવ કામગીરી હાથ ધરી શકાય તે માટે તમામ ટીમોને સ્ટેન્ડબાય રાખવામાં આવી છે. નદી કિનારાના અને નીચાણવાળા વિસ્તારોમાં સતત પેટ્રોલિંગ કરવામાં આવી રહ્યું છે, જ્યારે લોકોને બિનજરૂરી મુસાફરી ટાળવા અને તંત્રની સૂચનાઓનું પાલન કરવાની અપીલ કરવામાં આવી છે.

વહીવટી તંત્રએ જણાવ્યું છે કે ભારે વરસાદની સ્થિતિને ધ્યાનમાં રાખીને દરેક તાલુકામાં કંટ્રોલ રૂમ કાર્યરત કરવામાં આવ્યા છે. પરિસ્થિતિ પર સતત નજર રાખવામાં આવી રહી છે અને જ્યાં જરૂર પડશે ત્યાં તાત્કાલિક રાહત અને બચાવ કામગીરી હાથ ધરવામાં આવશે. તંત્રે લોકોને અફવાઓથી દૂર રહી માત્ર અધિકૃત માહિતી પર વિશ્વાસ રાખવા તેમજ કોઈપણ મુશ્કેલી સર્જાય તો તાત્કાલિક સ્થાનિક પ્રશાસનનો સંપર્ક કરવાની અપીલ કરી છે.