Fake Ghee Factory Chhatral: પામ ઓઈલમાં કેમિકલ ભેળવી તૈયાર થતું હતું નકલી ઘી

દરોડા દરમિયાન અધિકારીઓને મોટી માત્રામાં પામ ઓઈલ અને અન્ય સામગ્રી મળી આવી હતી. તપાસ એજન્સીઓના જણાવ્યા મુજબ, પામ ઓઈલમાં વિવિધ કેમિકલ અને અન્ય પદાર્થો ભેળવી (Gujarat Food Adulteration) તેને દેશી ઘી જેવો દેખાવ અને સુગંધ આપવામાં આવતી હતી. ત્યારબાદ તેને જાણીતા બ્રાન્ડ જેવા પેકિંગમાં ભરી બજારમાં સપ્લાય કરવામાં આવતું હોવાની આશંકા છે.

FSLએ લીધા નમૂના, તપાસ શરૂ

કારખાનામાંથી મળેલા ઘી (Fake Desi Ghee), પામ ઓઈલ અને અન્ય સામગ્રીના નમૂનાઓ ફોરેન્સિક સાયન્સ લેબોરેટરી (FSL)માં તપાસ માટે મોકલવામાં આવ્યા છે. લેબોરેટરીના રિપોર્ટ બાદ ભેળસેળની હકીકત અને તેમાં ઉપયોગમાં લેવાયેલા રસાયણો અંગે વધુ સ્પષ્ટતા થશે.

સમગ્ર સપ્લાય ચેઇનની તપાસ

તંત્ર હવે માત્ર કારખાનાની જ નહીં પરંતુ કાચા માલથી લઈને તૈયાર માલના વિતરણ સુધીની સમગ્ર સપ્લાય ચેઇનની તપાસ કરી રહ્યું છે. આ નકલી ઘી ક્યાં-ક્યાં વેચાયું, કયા વેપારીઓ સુધી પહોંચ્યું અને તેમાં અન્ય લોકોની સંડોવણી છે કે નહીં તે દિશામાં પણ તપાસ શરૂ કરવામાં આવી છે.

આરોપી સામે ફરી ગુનો નોંધાયો

આ કેસમાં આરોપી સામે કલોલ તાલુકા પોલીસ સ્ટેશનમાં ગુનો નોંધવામાં આવ્યો છે. તપાસ દરમિયાન સામે આવ્યું છે કે આરોપી સામે વર્ષ 2024માં પણ ભેળસેળ સંબંધિત ગુનો નોંધાઈ ચૂક્યો હતો. હવે પોલીસે તેના અગાઉના રેકોર્ડ અને અન્ય સંભવિત કડીઓની પણ તપાસ શરૂ કરી છે.

ભેળસેળયુક્ત ઘી આરોગ્ય માટે કેટલું જોખમી?

ખાદ્ય નિષ્ણાતોના જણાવ્યા મુજબ, જો ઘીમાં અયોગ્ય રીતે કેમિકલ અથવા ભેળસેળયુક્ત તેલનો ઉપયોગ કરવામાં આવે તો લાંબા ગાળે આરોગ્ય પર ગંભીર અસર થઈ શકે છે. આવા ઉત્પાદનોના સેવનથી કોલેસ્ટ્રોલ વધવું, હૃદય સંબંધિત સમસ્યાઓ અને હાઈ બ્લડ પ્રેશર જેવા જોખમો વધી શકે છે. જોકે, આ કેસમાં જપ્ત કરાયેલા નમૂનાઓ અંગે અંતિમ નિષ્કર્ષ FSL રિપોર્ટ બાદ જ સ્પષ્ટ થશે.

તંત્ર સામે સવાલો

ભેળસેળનો આટલો મોટો કારોબાર લાંબા સમયથી ચાલતો હતો તો સંબંધિત વિભાગોની નજરથી તે કેવી રીતે બચ્યો? અગાઉ પણ આરોપી સામે કેસ નોંધાયો હોવા છતાં ફરી આવી પ્રવૃત્તિ કેવી રીતે શરૂ થઈ? ગ્રાહકો સુધી નકલી ઘી પહોંચ્યું હોય તો તેની જવાબદારી કોણ લેશે? હવે લોકો કડક કાર્યવાહી અને નિયમિત ચેકિંગની માંગ કરી રહ્યા છે.