શું છે સમગ્ર મામલો?

માહિતી અનુસાર, નેશનલ હાઈવે-56 માટે જમીન સંપાદનની કામગીરી ચાલી રહી છે. આ પ્રક્રિયામાં જમીન જતાં કેટલાક ખેડૂતો યોગ્ય સહાય અને વળતર મુદ્દે અસંતોષ વ્યક્ત કરી રહ્યા છે.આ દરમિયાન એક ખેડૂતે ધારાસભ્ય કુંવરજી હળપતિ (Kunvarji Halpati)ને ફોન કરીને સહયોગ ન મળ્યો હોવાનો સવાલ પૂછ્યો હતો. ત્યારબાદ થયેલી ફોન પરની વાતચીતનો એક વીડિયો સોશિયલ મીડિયામાં વાયરલ થયો છે, જેને લઈને વિવાદ ઊભો થયો છે.

ધારાસભ્ય Kunvarji Halpatiની સ્પષ્ટતા

વીડિયો વાયરલ થયા બાદ કુંવરજી હળપતિ (Kunvarji Halpati)એ જણાવ્યું કે સોશિયલ મીડિયામાં ફરતો વીડિયો અધૂરો અને એડિટ કરેલો છે. તેમના જણાવ્યા મુજબ, ફોન પરની વાતચીતની શરૂઆતમાં સામેની વ્યક્તિએ પણ અપશબ્દોનો ઉપયોગ કર્યો હતો, પરંતુ તે ભાગ કાપીને માત્ર તેમની પ્રતિક્રિયા દર્શાવતો વીડિયો વાયરલ કરવામાં આવ્યો છે.તેમણે દાવો કર્યો કે આ સમગ્ર ઘટનાનો હેતુ તેમની રાજકીય છબીને નુકસાન પહોંચાડવાનો છે.

રાજકીય ષડયંત્રનો આરોપ

ધારાસભ્યે વધુમાં આરોપ લગાવ્યો કે વીડિયો વાયરલ કરનાર વ્યક્તિ રાજકીય રીતે વિરોધી પક્ષ સાથે સંકળાયેલી છે અને અગાઉ સ્થાનિક ચૂંટણીમાં ઉમેદવાર રહી ચૂકી છે. તેમના મતે આ સમગ્ર ઘટના રાજકીય લાભ મેળવવાના પ્રયાસનો ભાગ છે.

ખેડૂતોના હિતમાં કામ કરવાનો દાવો

કુંવરજી હળપતિ (Kunvarji Halpati)એ જણાવ્યું કે નેશનલ હાઈવે-56ના જમીન સંપાદન મુદ્દે તેમણે અનેક વખત ખેડૂતો અને વહીવટી અધિકારીઓ સાથે બેઠકો યોજી છે. ઉપરાંત રાજ્ય સરકાર તેમજ કેન્દ્ર સરકાર સમક્ષ પણ ખેડૂતોના પ્રશ્નો રજૂ કર્યા હોવાનું તેમણે જણાવ્યું.તેમણે કહ્યું કે પોતે પણ ખેડૂત પરિવાર સાથે જોડાયેલા હોવાથી ખેડૂતોની સમસ્યાઓને સારી રીતે સમજે છે અને હંમેશા તેમના હિતમાં કાર્ય કર્યું છે.

વિવાદ પર સૌની નજર

વીડિયો વાયરલ થયા બાદ સોશિયલ મીડિયા અને રાજકીય વર્તુળોમાં ચર્ચા તેજ બની છે. હાલ વાયરલ વીડિયોની સત્યતા અને સમગ્ર ઘટનાના તમામ પાસાઓ અંગે સ્વતંત્ર રીતે કોઈ સત્તાવાર પુષ્ટિ થઈ નથી.