ગણેશ આગમનમાં મોટી સંખ્યામાં લોકો ઉમટ્યા

રવિવારે યોજાયેલી ગણેશ આગમન યાત્રામાં ગણેશભક્તો અને યુવાનો મોટી સંખ્યામાં રામચોક ખાતે (Ram Chowk Surat) પહોંચ્યા હતા. કાર્યક્રમમાં અપેક્ષા કરતાં વધારે ભીડ એકત્ર થતાં રસ્તા પર ભારે ગીચતા સર્જાઈ હતી. એક સમયે લોકોને આગળ વધવા માટે પણ જગ્યા ન મળતાં ધક્કામુક્કીની સ્થિતિ સર્જાઈ હતી.

Surat Ganesh Aagman chaos: સંજય દત્ત વીડિયો કોલથી જોડાયા

ગણેશ આગમનના (Ganesh Aagman Yatra) કાર્યક્રમમાં બોલિવૂડ અભિનેતા સંજય દત્ત વીડિયો કોલ મારફતે જોડાયા હતા. તેઓ સ્ક્રીન પર દેખાતાં જ મોટી સંખ્યામાં લોકોનું ધ્યાન તેમની તરફ ગયું હતું. સંજય દત્તને જોવા માટે લોકો પ્રતિમા અને સ્ક્રીન આસપાસ એકત્ર થતાં ભીડ વધુ વધી ગઈ હતી.

ટેબલ તૂટી પડતાં લોકો નીચે પટકાયા

ભીડ વચ્ચે વીડિયો કવરેજ માટે ઊભું કરવામાં આવેલું ઊંચું ટેબલ અચાનકતૂટી પડ્યું હતું. ટેબલ પર રહેલા વીડિયોગ્રાફર્સ તેમજ આસપાસના કેટલાક લોકો નીચે પટકાયા હતા. ઘટનાને કારણે થોડા સમય માટે સ્થળ પર ગભરાટ ફેલાયો હતો. નીચે પડેલા લોકોને ભીડમાંથી બહાર કાઢવા માટે પણ મુશ્કેલી સર્જાઈ હતી અને કેટલાક લોકોને નાની-મોટી ઈજાઓ થઈ હોવાનું જાણવા મળ્યું છે.

રામચોક વિસ્તારમાં મોટી સંખ્યામાં લોકો એકઠા થઈ જતાં ભારે ધક્કામુક્કીથઈ હતી. ભીડમાં ફસાયેલા કેટલાક લોકોને શ્વાસ લેવામાં તકલીફ પડવા લાગી હતી. એકબીજાથી આગળ વધવાની કોશિશ દરમિયાન સ્થિતિ વધુ મુશ્કેલ બની હતી અને કેટલાક સમય માટે લોકોમાં ગભરાટ જોવા મળ્યો હતો.

ખિસ્સાકાતરુઓ પણ સક્રિય થયાની ફરિયાદ

ભીડનો લાભ લઈને ખિસ્સાકાતરુઓ સક્રિય થયાની પણ ફરિયાદો સામે આવી હતી. કેટલાક ભક્તોના મોબાઈલ ફોન અને અન્ય કિંમતી સામાન ગુમ થયાની વાત સામે આવી છે. જોકે, આ અંગેની ચોક્કસ વિગતો પોલીસ તપાસ બાદ સ્પષ્ટ થશે.

ભારે ભીડના કારણે ઘોડદોડ રોડ અને રામચોક આસપાસના માર્ગો પર પણ ટ્રાફિકની સ્થિતિ સર્જાઈ હતી. મોટી સંખ્યામાં લોકો અને વાહનો એકત્ર થતાં વાહનચાલકોને મુશ્કેલીનો સામનો કરવો પડ્યો હતો. આસપાસના રસ્તાઓ પર લાંબા સમય સુધી વાહનોની અવરજવર ધીમી રહી હતી.

8 દિવસમાં બીજીવાર આવી સ્થિતિ

આ જ રામચોક વિસ્તારમાં 23 ઓગસ્ટે યોજાયેલા ગણેશ આગમન દરમિયાન પણ મોટી ભીડને કારણે અફરાતફરી જેવી સ્થિતિ સર્જાઈ (Surat Crowd) હતી. ત્યારબાદ માત્ર આઠ દિવસમાં ફરી એકવાર સમાન પ્રકારની ગેરવ્યવસ્થા જોવા મળતાં કાર્યક્રમના આયોજન અને ભીડ વ્યવસ્થાપન સામે સવાલો ઊભા થયા છે.

પોલીસ અને આયોજકોની વ્યવસ્થા સામે સવાલ

હજારોની સંખ્યામાં લોકો એકત્ર થવાના હોવા છતાં ભીડને નિયંત્રિત કરવા માટેની વ્યવસ્થા પૂરતી હતી કે નહીં તે મુદ્દે ચર્ચા શરૂ થઈ છે. ટેબલ તૂટી પડવાની ઘટના અને ધક્કામુક્કી બાદ ભક્તોની સુરક્ષાને લઈને પણ સવાલો ઉઠ્યા છે. અગાઉની ઘટનાના આઠ દિવસ બાદ ફરી આવી સ્થિતિ સર્જાતા આયોજકો તેમજ પોલીસના આયોજન અને સુરક્ષા વ્યવસ્થાની સમીક્ષા કરવાની જરૂરિયાત સામે આવી છે.